على راحتى

الصفعة المؤلمه

2009-12-29T00:05:00.003+02:00

الصفعة المؤلمه

حين تأتيك الصفعة من شخص تعتبره من أقرب الناس اليا ان لم يكن اقربهم اليك بالفعل فعند ذلك يكون الالم والجرح مضاعف اولهم من اثر الصفعة والاخر لانها جاءت من شخص غير متوقع ان يقوم بهذة الصفعة . ولكن هذة هى الحياة فبفرض حسن النية لن أقول سوى انها صفعة جاءت فى لحظة ضعف وعدم ادراك لمن قام بها فمن منا معصوم من الخطأ ولكن هذا ما نكتبه على الورق ونناقش فيه الاصدقاء وهذا ايضا هو ما تقرأوه حاليا.

لكن.....................................................ا

حتى لا نكذب على أنفسنا أهذا ما نشعر به عندما نفكر فى الموقف بعد ان يحدث وتوابع هذا الموقف فعندما تحضر كوب الشاى وتقف لتشربه على مهل من نافذة غرفتك ماذا سيكون شعورك حين تتذكر صديقك الذى قام بفعل بعد هذا الفعل لا يستحق ان يكون صديقك او حتى زميلك او حتى أحد معارفك ؟؟ ماذا سيكون شعورك حين تتذكر حبيبتك التى كنت متفق معها على الزواج وعندما أتاها أول شخص ( مستريح ) تركتك وكأنها لم تعرفك يوما.

أحيانا نكون مضطرين ان ننسى وذلك لتستمر الحياة وأوقات أخرى لا نستطيع أن ننسى مع محاولتنا لفعل ذلك ولكن فى النهاية نفشل.

أحدهم بعد ان صفع فضل ان يعيش فى عالم من الخيال بعيد عن الواقع وفضل عدم الاحتكاك بالناس لمدة من الزمن ولكن هل ترون هذا الشخص ذات تفكير سوى ونظرة بعيدة الامد ام انه اختار الحل الأسهل وهو الهروب ؟؟ والاخر فضل بعد صفعه ان يكمل يكمل حياته فى مسارها الطبيعى وأبعد من قام بصفعه عن كل شئ فى حياته ولكن هل ترون هذا الشخص ذو فكر معتدل فى حين انه لم يأخذ فاصل يعيد فيه حساباته ولو لساعات ؟؟ا

فى النهاية سيظل الانسان هو الانسان وستظل الحياة معادلة صعبة ففى حين اننا كلنا مدركين ان لا أحد معصوم من الخطأ سوى الأنبياء ونقول هذة الجملة دائما محاولين اقناع أنفسنا بهذا المعنى ولكن سيظل ما فى القلب فى القلب مهما حاولنا ان نغيره ولكن لنحاول ان نعفو وننسى أملا ان يعفو عنا الله فى يوم نحتاج للعفو كما لم نحتاجه من قبل

.
http://www.youtube.com/watch?v=tX4EyiKcJWw

لا حول ولا قوة الا بالله

2009-07-07T00:14:00.003+03:00

لا حول ولا قوة الا بالله

على فين ياأمة محمد

بدعة لأ مش بدعة ودخلنا فى فيلم ملوش نهاية سب عالفضائيات ونقد بعد ساعات بيبقى بناء وبعد ساعات لأ والواحد مش عارف ياخد معلومته منين والناس تايهة والحال فى النازل ما هو أحساسى وأحساسكوا لما تلاقوا شيخ ربنا كرمه وأطلق لحيته وتلاقيه يستهزأ بكلام واحد تانى بيدعوا الى الله بكلام يقدر الشباب يفهمه وفى نفس السياق هذا الشاب الداعى الى الله تجاوز ليس نقلا فى الدين عن الأئمة الكبار ولكن كان هناك بعض التجاوزات للدعاة اللى يتشددوا وبيقولوا على كل حاجه بدعة

دنمارك رايحين ولا جايين لو تفتكروا من سنة الحرب الشرسة اللى كانت بين عمرو خالد وعدد من الدعاة كانوا معاه فى مؤتمر الدنمارك زى الحج على جمعة المفتى وغيره ومن جهة أخرى دعاة ضد المؤتمر وضد اننا نروح مهزومين منكسى الرؤوس وكان على رأسهم الشيخ القرضاوى حرب شرسة عالفضائيات وشتايم وقلة أدب ومشاهدين يدخلوا يهزأوا فى ده ويشتموا فى ده فضايح والله لو مغنيين أو ناس سفيهة مش هتعمل كده مع بعض

أسلوب تريقة ورمى كلام متعملوش الا الستات يشتهر بيه داعية فى نظرهم وليس فى نظرى لانه ليس كل من حفظ ايات الله يقدر يتكلم بيها دائما يوجد هذا الداعية عالتلفزيون المصرى وياويلك لو عارضته ليلتك مش فايته أتلغت كلمة حوار ونقاش من قاموسنا من زمان وتقريبا مش هترجع قريب

الفرقة بتزيد والأختلاف بياكل فينا أكتر وأكتر ومش عارفين ناخد المعلومة منين والناس متلخبطة ومش عارفه تعمل ايه ولما واحد يبقى لسه متدين جديد يشوف الكلام ده هيلف ويرجع تانى مفيهاش الكلام واللى يضايقك ان كل واحد يطلع يبدأ حديثه بأدب الخلاف ويخش يخبط بعد كده براحته

لنا الله

أعتذر الفترة اللى فاتت عن تأخيرى كنت مشغول جدا بمشروع التخرج أدعولى بقى ربنا يكرم فى النتيجة

بالنسبة لحملتنا الرائعة اللى فيها أقبال مكنتش متوقعه الصراحة مع انى مكنتش متابعها الفترة اللى فاتت لسه عاملين جروب عالفيس بوك علشان نوصل لكل الناس اللى معندهاش مدونة والحمد لله الأقبال عليه جميل ولينكه هو

http://www.facebook.com/home.php#/group.php?gid=92541139819

وعايزين الفترة الجايه ننشر اللوجو والبوستر على قد ما نقدر ولينكاتهم زى ما سبق وقولتهالكوا

اللوجو
http://www.2shared.com/file/6320725/f37fab5b/____2.html?

البوستر
http://www.2shared.com/file/6320757/52305cb0/___online.html?

أى أقتراح كلى اذان صاغية

ومن أحيا نفس فكأنما أحيا الناس جميعا

2009-06-14T19:12:00.006+03:00

السلام عليكم

أولا أعتذر عن التأخير بس كان لازم أخد فترة نقاهة بعد الأمتحانات نرجع تانى لحملتنا اللى انا وشباب وبنات كتير ربنا يجازيهم كل الخيرات قررنا ان احنا بمشيئة الله وعونه نبدأها وهى محاولة توعية الناس بضرورة التبرع لمعهد الأورام مش بالضرورى التبرعات تبقى معانا أحنا دى مجرد حملة توعية زى ما سبق وقلت

الحمد لله وأكتر ما كنت متوقع بكتير شباب وبنات كتير أبدوا أستعدادهم الأولى للمشاركة فى الحملة كل واحد على قد ما يقدر حتى ولو قدام جهازه يقدر يوصل حملتنا لناس كتير ويقدر يوصل كلامنا للناس المغتربة فى الدول العربية والأجنبية

ان شاء الله هقول على أول خطواتنا فى الحملة دى وهتبقى خطتنا ان شاء الله نبتدى بكام نقطة وبعد فترة معينة هنتفق عليها نقول أنجزنا قد ايه على بركة الله هنبدأ بأول 3 مراحل فى حملتنا

1 / نشر اللوجو بتاع حملتنا فى مدوناتنا ومحاولة نشره فى أكبر عدد من المدونات والمنتديات والمواضيع والأماكن المختلفة وياسلام لو نقدر نطبعه ونكبره ونوزعه على حبايبنا وقرايبنا ونلزقه على عمارتنا والعماير اللى جنبها كل ده طبعا حسب مقدرة كل واحد

لينك اللوجو

http://www.2shared.com/file/6320725/f37fab5b/____2.html?

لينك البوستر اللى هنوزعه ونحطف فى أى مكان بعد ما نطبعه

http://www.2shared.com/file/6320757/52305cb0/___online.html?

2/ عمل جروب عالفيس بوك وعمل انفيتيشن لأكبر عدد من الناس وهتكون مواضيع الجروب عن قصص ناس ربنا أنعم عليهم بالشفا وترغيب فى عمل الخير لوجة الله تبارك وتعالى وياريت كل اللى هيبقى معانا فى الحملة يبقى معانا فى الجروب من منشأينه علشان نقدر كلنا نشتغل فيه

3/ هنعمل بعون الله مدونة وكل ما حد يعمل حاجه أو يحس انه أنجز فى حاجه يكتب عنها ونقدر برده ننزل فيه بوستات ترغيب فى عمل الخير وبكده يبقى فى مرجع لكل اللى عملن خلال حملتنا

طبعا الأقتراحات انا مستنيها منكوا وكمان لو اى حد ليه تعليق على أول 3 مراحل فى الحملة كلى أذان صاغية

هقول أسماء الشهرة للناس اللى أكدت وجودها معانا فى الحملة

اللؤلؤة

ريمان

همسة

رؤية

حياتى نغم

شمس النهار

كيــــــــــــارا

د/عرفه

dr aly khamis

والبقية ستأتى ان شاء الله لانى عارف ان الشباب ما بيصدق يلاقى حاجه خير ويجرى علشان يعملها

جزاكوا الله من خيره

والله يستحقوا

2009-05-26T12:51:00.003+03:00

والله يستحقوا

فى وقت ما كل الأنظار متوجهة لمستشفى 57357 لعلاج سرطان الأطفال والحملة الضخمة اللى معمولة لجمع التبرعات للمستشفى حتى بعد ما أتجهزت شفت برنامج واحد من الناس للأعلامى المحترم عمرو الليثى وكان جايب حالات من معهد الأورام

أقسم بالله أنا مسكت نفسى بالعافية وحمدت ربنا ألف مرة على النعمة الكبيرة أوى أوى أوى اللى عندنا وهى الصحة فأفتكرت من كام شهر لما كنت تعبان تعب بالنسبة ليا تقيل أوى بس هو فى ميزان المرض ولا حاجه وقلت فى عقل بالى امال الناس دى بتحس بايه؟؟؟؟؟؟؟؟؟؟ ربنا يشفيهم

والله ياجماعة حالة المعهد صعبة ومحتاجين حاجات كتير جدا والحاجات دى لوازم يعنى ضرورية جدا بما ان العلاج بالمجان والغلابة عندنا كتير فعايزين حاجات كتير فى المعهد وانتوا عارفين اللى يساعد انسان ثوابه عند ربنا ايه فما بالكوا بواحد بيساعد انسان علشان يعيش هيكون ثوابه عند ربنا ايه “ومن أحيا نفساً فكأنما أحيا الناس جميعاً ..” فتخيلوا عظمة الثواب

فكرتى اننا نعمل حملة اقناع للناس بان التبرع للمعهد ده يتضمنه زكاة المال يعنى تزكى بفلوسك علشان واحد يعيش بسببها ولا تزكى بيها علشان واحد ياكل ويشرب وهى دى الجملة اللى هتبقى مدخلنا

لو كل مدون بقى معانا فى حملة زى كده وأقنع الناس ولم تبرعات من حبايبه وقرايبه واصحابه شوفوا هيبقى معانا كام مدون وكل مدون هيبقى معاه تبرعات قد ايه ولما نتبرع للمعهد يبقى المبلغ اللى هنتبرع بيه محترم وانا أتوقع ان لو اللى بحلم بيه حصل هنتبرع بعشرات الألاف وشوفوا هنقدر نساعد كام واحد على انه يعيش

الموضوع فى غاية الجد والأهمية ياجماعة المعهد حالته متدهورة جدا وان شاء الله هعمل لوجو للحملة قريب جدا علشان كل واحد مننا ياخده ويطبعه ويديه لكل معارفه وأصدقائه وهيبقى المدونين بكده ليهم دور فى المجتمع وأهم من ده كله زضا ربنا علينا ونحس ان بمدوناتنا قدرنا نقرب من ربنا

ان شاء الله اللوجو فى اقرب وقت هيكون جاهز بس حابب أشوف تعليقات الناس على الموضوع ده وأقتراحتهم علشان تبقى حاجه منظمة ورجاء من كل مدون يقرأ البوست ده ينشره على قد ما يقدر فهدفنا وصول فكرة الحملة دى لأكبر عدد من المدونين

وجزاكم الله كل خير ورزقكم الجنة

فترة ترقب

2009-05-20T10:06:00.005+03:00

السلام عليكم

الفترة اللى جايه حاسس انها فترة مهمة فى كل حاجه فى البلد فالأحداث اللى هتحصل الشهرين اللى جايين كتير وحيوية وهتأثر كتير فى كل حاجه فى مصر وللأسف كانت بداية الأحداث أول أ مبارح بليل بوفاة حفيد الريس ربنا يرحمه اللى هيكون ليه أثر متوقع فى أمكانية الغاء الريس لزيارة أمريكا وبالتالى منعرفش أوباما جاى ولا لأ

كنا مستنيين زيارة الريس لأمريكا مش حبا فيها ولا حاجه بس علشان نعرف الحياة ماشيه أزاى اليومين الجايين ولا الآدارة دى زى اللى قبلها وهنفضل محلك سر لفترة جاية مش قليلة وكمان زيارة أوباما لمصر وانه يلقى خطاب للعالم الأسلامى والعربى من عندنا طبعا ليه مدلول واضح جدا على مكانتنا اللى مش هيقدر يقرب منها أى حاقد

بكرة الحكم اللى أنا بعتبره تاريخى فى القضاء المصرى وهو الحكم فى قضية مقتل الفنانة سوزان تميم والمتهم فيه هشام طلعت مصطفى بالتحريض على قتلها تاريخى ليه؟؟ أولا أنا عن نفسى مشفتش رجل أعمال كبير فى الدولة قبل كده بيتمسك فى قضية زى دى لمجرد وجود كام دليل مش كتير يعنى القضية مفيهاش دليل قوى على انه عمل كده وحتى لو كان فعلا هو المحرض فيحسب للنيابة المصرية اصدار قرار بالقبض عليه وهو من هو هشام طلعت مصطفى

ثانيا الحكم بكرة فى حالة عدم ادانته هيكون ليه مفعول السحر على مجموعته بشكل عام واستثماراتها وأسهمها فى البورصة بشكل خاص وبالتالى البورصة عموما علشان كده يعتبر من الأحكام المهمة جدا فى تاريخ القضاء المصرى

فى برده الفترة اللى جايه طلب شركة فرانس تليكوم شراء كامل أسهم شركة موبينيل وده لو حصل بسرعة هيبقى ليه مفعول السحر على أقتصادنا وبورصتنا وده طبعا يدل على أهمية الشركة وقوة الاستثمار فى أقتصادنا

كمان كام يوم انتخابات نادى الزمالك وهنشوف هل هتنتهى المهازل اللى بتحصل فى النادى من فترة ؟؟ ولا هتستمر لوقت تانى وهيستمر تواجد البلطجيه فى كل حته فى النادى واللى بسببه لا يمكن نشوف نادى الزمالك هيرجع لوضعه الطبيعى

وغير كده فى أحداث كتيييير بس دى أهم الأحداث

أعذرونى على تأخرى فى الردود عيكوا والمرور على مدوناتكوا علشان ظروف أمتحاناتى دعواتكوا

اختيارات طائر

2009-05-13T12:02:00.003+03:00

اختيارات طائر

هو طائر يرى فى نفسه انه من الممكن ان يكون طائر غير عادى مما يعنى انه لن يكون مثل باقى الطيور تصحوا فى الصباح الباكر باحثة عن الطعام الذى يكفى يومها فهو طائر طموح لا يريد ان يكون مثل باقى نوعه

لكن كما نقول ليس كل ما يتمناه المرء يدركه فأيضا ليس كل ما ترجوه الطيور تلقاه فليس الحلم وحده هو الدافع الرئيسى لتحقيق الشئ بل توجد عوامل أخرى متحكمة فى كل حلم فالقيود التى واجهها هذا الطائر كبيرة سواء كانت قيود نابعة من الطير نفسه أو قيود ناتجة عن العوامل المحيطة بهذا الطائر

كان لهذا الطائر أختيارين لا ثالث لهما وهما اللذان كانا متاحين فى هذا الوقت واولهما هو أن يبدأ فى طريقه نحو تحقيق حلمه ولكن بايقاع بطئ لا يلاحظه من حوله ممن يشكلون القيود المحيطة به وثانيهما أن يعيش يومه مثل باقى الطيور وينس حلمه ويحاول ان يلغى هذا الجزء الموجود فى أعلى رأسه حتى لا يحلم مجددا

بالطبع كأى نهاية لأى قصة لا بد أن تكون النهاية على هوى قارئها فيكون الأختيار الأول هو الأحب لنفس كل قارئ فما أحلى أن يحقق الأنسان أو الطائر ما يحلم به ويضرب بكل المشاكل التى تعصف به عرض الحائط

ولكن ما نقرأه يكون دائما فى قصص الأطفال انه لا بد أن يعيش البطل حالها كحال أفلامنا العربية ولكن الواقع يختلف كثيرا عن هذة النوعية من القصص والأفلام

فمن الممكن أن تكون هذة العوائق قوية بما يكفى لتغير من الواقع وتغير كثيرا من ملامح شخصية هذا الحالم سواء كان انسان أو طائر ولكن يظل فى النهاية الأكثر ذكاءا هو الأكثر قدرة على السعى فى طريقه لتحقيق حلمه دون أن يخسر أحد ممن يحيطون به وأن يستطيع التغلب على هذة العوائق بحرفية عالية

وحتى كتابتى لأخر حرف فى اختيارات طائر لا أعلم أيا من الأختيارين سوف يختار هذا الطائر أو انه سوف يملى عليه أحدهما لكنى كلى أمل فى الله أن أعاود الكتابة عن هذا الطائر فى أقرب وقت ويكون وقتها قد علم ماذا يريد وأتجه نحوه

التافه ملوش مكان

2009-05-09T13:55:00.005+03:00

أنت مش تافه طب قوم بسرعة من هنا

تقريبا دى الجملة اللى بتدور فى خاطر كل واحد فى أى تجمع من التجمعات لو قابل واحد مش تافه أو بمعنى أصح عايز يبقى محترم سواء الأحترام ده كان فى كلامه أو تصرفاته أو أراءه أو مظهره

عايز أسأل سؤال هو اللى مش تافه ده الناس بتشوفه شخص كئيب وملوش فى الضحك والهزار وأنه على طول جد؟؟ أنا رأيى لأ طبعا ده شخص سوى بيعرف أمتى يضحك وأمتى يبقى جد بس الضحك ميكونش بأسفاف وأى كلام يتقال فما أسهل أن الواحد يضحك ويضحك اللى حواليه بكلام جارح

وكمان رسولنا الكريم عليه أفضل الصلوات والسلام نهانا عن اللغو فى الكلام وقال لو أتكلمنا يانقول خير يامنتكلمش من الأصل بس المشكلة فى البيئة اللى حوالينا تقريبا معظمها بقى كده ولو الواحد قرر أنه ميندمجش فى البيئه دى هيشترى كوخ وهيقعد فيه لوحده

المشكلة فى الأساس أنه مفيش قضيه حقيقية أو حاجه بجد الناس تتشغل بيها فالشباب عندنا اللى بيدرس يبقى يدرس بس لكن شغل وكده أو أى نشاط تانى بيبقى غير مرغوب فيه خلال فترة الدراسة فخلاص قعدتنا بعد الدراسة هتبقى على قهوة أو كافية نتكلم على فيلم أو أغنية أو ماتش كورة مش بقول أن أحنا منتكلمش فى الحاجات دى بس ميبقاش كل يوم لمدة 6 ساعات فى 365 يوم فى السنة

نطلع من البروب دى أزاى رأيى أن أحنا نتعامل مع كل الناس ونتكلم ونقعد وكل حاجه لكن أول ما الموضوع يرمى على تفاهه زيادة نوقفه بصنعة لطافة يانغير الموضوع يانحور موضوع التفاهه لموضوع جد ونخلط بينهم بحاجه

التفاهه مرض أنتشر وتوغل بينا أحنا كشباب زى ما المياه بتتوغل فى التربة فتقريبا معظم الحوارات بتاعة الشباب دلوقتى نفاهه فى تفاهه والموضوع ده نابع من عدم ثقة الشباب بقدراتهم وبنفسهم ويقلولك يعنى أحنا اللى هنغير الدنيا

ومجاش فى دماغهم أن الأمة الأسلامية كان أساسها مجموعة من الشباب أكبر تقريبا كان زيد بن حارثة كان فى أواخر العشرينات بالأضافة للصديق والله ياشباب لو دماغنا ألاتفتحت وكان هدفنا خدمة الأمة أكيد أكيد حالنا هيتغير

وصباحكوا ان شاء الله مفيهوش تفاهة

القتل الخطأ

2009-05-03T00:02:00.005+03:00

القتل الخطأ

الأول أنا أسف على أنى أتأخرت أوى فى الردود على الناس زى ما أتأخرت فى كتابة البوست وأوعدكوا أنى فى أقرب وقت هنزل الجزء التانى من (( كل ده بسببنا)) اللى بيتناول ان أحنا كنا السبب فى اللى بيحصل فى فلسطين وأزاى اليهود بيخططوا من قرون للأحتلال ده

نيجى بقى لموضوع البوست ده والله حاجه تحزن أنه كل يوم أرواح جديدة بتضيع ودماء جديدة بتهدر عالأسفلت وكل ده تحت ثغرة فى القانون أسمها القتل الخطأ فى الحقية معرفش هى ثغرة ولا مقصودة علشان ولاد الكبار لما يعملوا اللى يعملوه يبقى فى ثغرة تحميهم

عجيبة أوى لما واحد يتمسك فى المخالف يبقى عقوبته السجن وبتتخفف لغرامة ألاف الجنيهات ده بجد حصل مع ناس أعرفهم ولما واحد يضيع روح يقولك قتل خطأ بغض النظر بقى مين الغلطان مش مشكل ما هو مشكلة القتيل أنه كام ماشى طالما ربنا مش كارمة بعربية علشان يدوس بيها الناس خليه فى بيته

المشكلة مش فى القانون المشكلة فى اللى أحنا أدينلهم صوتنا علشان يطلعوا قوانين تحمينا وهما أعضاء مجلس الشعب المبجلين أزاى تعدى عليهم حاجه زى كده ولا هما معدينها بمزاجهم علشان ولادهم وولاد أخواتهم

ذنبها ايه أم كل اللى فى دنيتها أبن يروح فى حادثة ويقلك قتل خطأ ويطلع حكم بغرامة 500 جنية ويكون غيابى كمان للدرجة دى الروح عندنا مبقاش ليها أى تمن

مش بس كده دلوقتى لما الداخلية تبقى مزنوقة فى قرشين تقوم نعمل ايه تحطلك كام لجنة على كام رادار فى مناطق مش منطقى انه يتحط فيها رادار يعنى مثلا يحطلك رادار بعد مدخل اى بلد ويفلك انت داخل المدينة وسرعتك اخرها 40 مع انى لسه فى الصحرا والطريق فاضى بس نقول ايه الداخلية مزنوقة ولازم نقف جنبها

اه يابلد رايحه بينا على فين بس العيب مش فيكى العيب فينا أحنا

أبقوا قابلونى

2009-04-15T00:25:00.002+02:00

أبكى

أبكى على حالنا وما وصلنا إليه كعرب
على مثل للمقاومة قد كان والآن قد ضرب
على تدخل في شئون بلدي وخصوصا إن كان من شيعي
على فرصة أعطيناها على طبق من دهب لكل يهودي
على سماحة الشاطر حسن
على ما خلفه من عفن
على الحرب التي تشنها علينا إيران
على قدوتي في التحدي وقد كان في طهران
على سب رئيسي في قناة مأجورة أسمها المنار
على قصص لن نجنى من ورائها سوى الدمار
على ديني الذي يسب خارجا
على نقاش لم يصبح دارجا
على تعليقات القراء مصري أو غير مصري
على ردود الفعل من كل عربي
على متعصب للمقاومة ولم يفهم غيرها
على فكر وكأنه عربة لن تغير سيرها
على انتهاك لسيادة دولتي
على مصر فخري وعزتي
على موقف حماس
على أناس كنا لهم أقرب الناس
على قدس لن تتحرر قريبا
على حالنا الذي صار غريبا

لنا الله ياعرب

بحبك ومش هسيبك

2009-04-09T10:41:00.004+02:00

بحبك ومش هسيبك

كتير مننا بيقول كلام وخلاص لكن لما يقعد مع نفسه ويقلب الكلام فى دماغه ولما يحصله موقف يبين عكس الكلام اللى بيقوله بيعرف حقيقة موقفه اه بحبها ومش هسيبها

اى حد يقولى عايز حياتك باذن الله تبقى عامله ازاى بعد ما تخلص دراستك ردى بيكون تلقائى من غير تفكير اشتغل فى اى حته بره حتى لو دولة أفريقيه يقولى ليه؟؟؟ ردى علشان البلد دى مبتديش حد حاجه بتاخد بس

ده الكلام اللى بيطلع من اللا وعى طبعا غلط ان احنا نقول حاجه من غير منكون عارفين احنا بنقول ايه بس ده اللى بيحصل نيجى للمواقف اللى بتبين حقيقة موقف الواحد اول موقف اللى حصل خلال احداث غزة والهجوم اللى اتعرضناله من بعض القادة والسياسيين العرب طبعا محدش مننا سكت وكان دمنا محروق على الكلام اللى بيتقال على مصر وتزييف الحقائق وكل واحد مننا عمل اللى يقدر عليه علشان يدافع على مصر

تانى موقف لو احنا البلد دى متهمناش طب ليه بنتنكد ويبقى يوم مش معدى لو اتغلبت ولا اتعادلت فى الكورة محدش يقولى ده فراغ شباب بيقضوه فى اى حاجه هقوله معلش فى الف حاجه يتقضى بيها الوقت بعيدا عن الانتماء لمصر يمكن هى دى الحاجه الوحيدة المتاحة لينا ان احنا نبين فيها انتمائنا بما اننا فى بلد بلا احزاب سياسية ومفيش حاجه نقدر نبين فيها انتمائنا الا الكورة والرياضة بس فى الاخر كله أنتماء

بقول لنفسى قبل ما اقول لغيرى احنا شايفين دلوقتى ايه اللى بيحصل فى المصريين بره من عدم احترام وانهم على اول اللسته يعنى لو طلبت معاهم يمشوا حد هيبقى المصرى اول واحد واللى عايز يوصل هيوصل فى البلد دى زى ما هيوصل بره هو هيتعب شويه زيادة بس هيوصل ان شاء الله فى الاخر فالبلد دى اولى بينا

للأسف احنا لسه عندنا عقدة الخواجة مع انهم فى الدول التانيه بيبقوا متعصبين اوى اوى لجنسهم ولغتهم ياريت تبقى المعاملة بالمثل علشان يرجع تمنا يزيد فى سوق البشر علشان للأسف رخص أوى دلوقتى

عندنا سلبيات كتير بس السلبيات دى السبب فيها المصريين مش مصر والفرق كبير وواضح

بحبك وهفضل أحبك يا مصر

هى ناقصة

2009-03-29T01:06:00.003+02:00

هى ناقصاكوا أنتوا كمان

فى زمن كترت أوى فيه الرايات الحمراء فى البلكونات كناية على أنها شقق لل......... أيوة أنتوا فاهمين قصدى فمفيش منطقة سكنية ممكن تنزلها دلوقتى الا وأفتكرت أن كل سكان المنطقة بيشجعوا النادى الأهلى من كتر الرايات الجمراء

لغاية هنا وقولنا ربنا يهدينا ونعف نفسنا كشباب عن هذة الكبيرة وللأسف تحول الزنا لشئ عادى فى مجتمعنا فكنت مرة راكب مع سواق تاكسى فبيكلمنى على الستات اللى بيركبوا معاه والعلاقات بعد كده مع الستات دى وتليفونات ومقابلات والذى منه فبيكلمنى عن واحدة وبيقولى مش هسيبها غير لما......... قولتله ياأخى أتقى الله قالى ياعم أنا والله مازنيت كتير أوى زى ما أنت فاكر فقولتله شكرا ده أنت شكلك متعود على الحرام ونزلت وسيبته

ييجوا يطلعولنا بموضوع تانى وهو موضوع الشواذ اللى بجد بقى ظاهرة منتشرة بطريقة مش طبيعية وأنا اللى كنت فاكر علاء أسوانى فى رواية عمارة يعقوبيان بيأفور ويقول أى كلام اللى يغيظك أنهم مبيتكسفوش من أنهم يتكلموا عن حاجه زى كده قدام الناس عادى خالص كأنه بيتكلم عن المثل والأخلاق لا وكمان بيدعوا للأنضمام لحاجه زى كده

مش بس كده دول كمان ليهم أجتماعات وندوات والله والله الكلام اللى بقوله وهقوله حقيقى مش من خيالى فين شرطتنا المحترمة عن الناس دى لو رحنا بلغنا عن مجموعة أو حد معين يقولولك فى دليل أنا اللى أعرفه انى بمجرد انى أبلغ تبقى دى وظيفتهم أنهم أولا يتأكدوا من كلامى وبعد كده هما اللى يمسكوه متلبس أمال فى رأيكوا همسكوا متلبس أزاى الا لو عملت زيه

حاجه تغيظ وتجيب الضغط والسكر الناس دى فين من ربنا دول لو يعرفوه أصلا حتى لو يعرفوه فمفروض ان فطرتهم تقولهم ايه الصح والغلط ولا صحيح فطرة مين فى بيت كله كده هتلاقى الأخوات نزلين يدوروا على رزقهم فى جامعة الدول وأمهم هى اللى بتوزعهم علشان يغطوا أكبر جزء ممكن فأكيد الفطرة هتبقى متغطيه ومش باينه

واللى طلع من كام يوم (الأيموز) شعارهم العاطفة هى المحرك الرئيسى للأنسان فحكم عاطفتك فى كل شئ ومشيين ورا أسم منظمة معروف عنهم حاجات أعوذ بالله منها ويقلولك أحنا مش بنعمل كده سبحان الله طيب خدت أسمهم ليه زى المحترف اللى بيلبس تيشرت عليه أعلان خمرة ويقلك أنا مبشربش طب ما أنت بتروج ليها لا اله الا الله المهم العالم دى أتوضبت من أهالى مناطقهم المحترمين واللى يعرفوا ربنا

رجاء من كل واحد أى حد لو شاف حد من العالم دول الشواذ ميسيبهمش يعمل فيه اللى ربنا يقدره عليه ولو معرفش يعمل حاجه مش هقولكوا يضربه علشان دينا ماقلش كده يسيبه لربنا اللى أكيد مش هيسيبه

انا لله وانا اليه راجعون فى مجموعة مش قليلة من شباب المسلمين

التحرش

2009-03-23T14:08:00.005+02:00

التحرش

فى وقت ما كل القنوات بتتكلم عن التحرش وبتعمل حلقات عنه وتجيب الضحايا وتعمل ريبورتات وفى وقت الدولة بتعمل قانون جديد للتحرش سواء كان اللفظى او الحركى او الأغتصاب لى وقفة

أنا مع توقيع أقصى عقوبة على المغتصب وعلى المتحرش باللمس اذا كان فى دليل محترم ضده لكن بالنسبة لقانون خدش حياء أنثى ليا وقفة عنده يعنى ايه واحد لو قال كلمة لواحده لمؤاخذة رقاصة ماشية فى الشارع يبقى خدش حياء وعقوبته عالأقل سنة وهى بلبسها مبتخدش حياء ألاف الشباب المحترم؟؟؟ غريبة

ناس كتير هتقولى دى حرية شخصية سورى الحرية الشخصية أنك تعمل اللى أنت عايزه بدون التعرض لحقوف الأخرين وبما أننا مفروض فى بلد أسلامى عربى فأنتى بلبسك ده بتتعرضى لحرية نظرى فمش معقول همشى أبص فى الأرض

يعنى ايه ببلاغ صغير نلاقى الشرطة جت ولمت كل الشباب الموجود سواء كان محترم أو غير محترم توافرت الأدلة ضده أو لم تتوافر بس بما أن الموضوع كبير دلوقتى يبقى عملوا اللى عليهم

يعنى ايه ممكن واحدة بمنتهى السهولة تتبلى على واحد ويعينى يتشد من قفاه ويتظبط يوم ولا أتنين وهو ميعرفش يكلم بنت أصلا مش يعاكس

أنا ضد أى شخص غير محترم يعاكس بنت ويتعرض ليها وأنا بساند أى بنت تتعرض لموقف زى ده فىالشارع بس لما نعمل قانون ولما نصعد موضوع لازم نتناوله من كل الأوجه مش نظبط حاجه ونبوظ التانية لما القانون بتاع خدش الحياء يقول مثلا لازم يتوافر 3 أو 4 شهود ميكونش ليهم علاقة ولا بده ولا بدى ساعتها يبقى قانون محترم مش محابى لحد على حساب التانى

لما يبقى فى قانون يمنع القاعده فى الشارع قدام قهوة أو محل ويغرم اللى يعمل كده كلنا هنبقى معاه طالما القانون ماشى عالكل وهيمنع وقوع مشاكل كتير ولما يبقى فى قانون يمنع تجمع الشباب على عربياتهم فى شوارع المارة اللى بتبقى زحمة ساعتها هنبقى معاه

والأهم من كل ده لما يبقى فى عناصر محترمة من الأمن فى الأماكن اللى بيبقى فيها تجمعات ناس وتحرر محضر فورى ويبقى القانون ده حقيقة مش خيال كلنا هنبقى معاه

أنا ضد أى ولد مش محترم ومع أى بنت محترمة لكن ياريت لما نطلع قوانين نراعى كل الجوانب فى القوانين دى ومنجيش مع حد على حساب حد

أنا كتبت البوست ده بعد ما سمعت أن فى حالات تبلى على ناس كتير ملهمش فى أى حاجه وياريت لو ثبتت حاجه زى كده تعاقب البنت المدعية لأنها بتتبلى على شخص ملوش ذنب فى حاجه

والله هييجى مننا

2009-03-16T15:03:00.002+02:00

أن شاء الله هييجى مننا

أحنا حلويين أوى ربنا خلقنا كائنات عاطفية وليست منطقية يعنى كل واحد مننا ليه زرار لو دوست عليه صح وفى الوقت المناسب هيعمل اللى انت عايزه

قبل كده كنت بشوف اللى بيشرب مفيش أمل منه واللى بيزنى ده ضاع خلاص واللى بيكدب انسان مش كويس بس الحمد لله عرفت مع انى عرفت متأخر ان كل واحد ليه دخلة والناس بجد كلها فيها حاجه كويسة لو قدرنا ندخلهم من الحاجه دى هنقدر بعون الله نعدل اللى مش متعدل فى الشخص ده

طب أزاى نحاول نعدل الحاجه اللى مش مظبوطة من وجهة نظرنا فى الشخص ده خلو بالكوا ان هى لغاية دلوقتى مش مظبوطة من وجهة نظرنا لكن بالنسبة للشخص ده فهى عادية

هقلكوا على الأسلوب اللى أنا بتبعه حاليا أول حاجه توصل العلاقة مع الشخص اللى أنت عايز تنصحه وتخليها علاقة قوية جدا بحيث ان بعدين لما ييجى وقت توصيل اللى انت عايز تقوله يبقى وسط الكلام العادى مش عن طريق درس وخطبة

تانى حاجه حسس الشخص اللى ادامك بمدى أهميته يعنى (أديله برستيجه) وابعد عن الكلام اللى بيضايقه واهتم باى حاجه بيهتم بيها ودايما أتكلم معاه فيها

تالت حاجه انك يبقى عندك الحجة اللى تقدر تتكلم بيها وده هييجى بالقراءة والأطلاع على الموضوع اللى أنت ناوى تكلم فيه صاحبك

اخيرا نيجى بقى للمصارحة وأنت بتنصحه قوله أنت حبيبى أنا متخيلش أنى أخسرك فى يوم من الأيام ونفسى أنك متعملش كذا أو تعمل كذا وشوية حجج من اللى أنت أطلعت عليها وياسلام لو معاك فيديو أو غيره تديهوله يشوفه وده يدعم الموضوع أكتر

بجد ياجماعة أحنا كويسين أوى وكل واحد مننا الحاجات الحلوة اللى فيه أكتر من الحاجات الوحشة بس أهم حاجه أننا لما نلاقى حاجه مش حلوة قدامنا نحاول نصلحها ومنبقاش سلبيين لو كل واحد حاول يصلح أى غلط قدامه مش هيبقى فيه غلط

بأيدينا مش بأيديهم

2009-03-07T12:05:00.002+02:00

بأيدينا مش بأيديهم

الوحدة تصنع المعجزات مقولة صادقة قولا و موضوعا فمفيش أمة نهضت من غير وحدة كل طوائف الشعب ومفيش أمة طلع عنين اللي جابوها إلا بالفرقة وعدم سماع حد لكلام التانى

بعد أحداث غزة الأخيرة قريت وشفت كتير عن تاريخ فلسطين علشان زى ما قلتلكوا كان للأحداث دى تأثير كبير عليا في حاجات كتير أهمها أن أنا أعرف تاريخنا أكتر القصد أن أنا فهمت إلى حد ما كتير عن فلسطين وإنشائها واللي حصل قبل وبعد الأيام السودة دى

لقيت حاجات للأسف فاجأتني وأحزنتني فإحنا للأسف كنا السبب بطريقة غير مباشرة في اللي بيحصل في فلسطين دلوقتى أيوة أحنا فالطمع هو السبب في اللي أحنا فيه نرجع بقى للتاريخ شوية شوية وخليكوا معايا

قبل الحرب العالمية الأولى كانت شبة الجزيرة العربية و فلسطين و سوريا وتركيا وبلاد تانية كتير في جنوب أوروبا تحت سلطة الإمبراطورية العثمانية الضعيفة في هذه الفترة وكانت للإمبراطورية أطماع في استرجاع مصر وباقي الدول العربية لتعود لسابق عهدها

طبعا كان عدوها الأساسي زى ألمانيا وهو دول الحلفاء اللي هم بريطانيا و فرنسا و ايطاليا وغيرهم الدول اللي بتحتل الدول العربية فبمقابل مادي محترم وافقت تدخل الحرب بجانب ألمانيا لتحقيق مطامعها في استعادة الدول العربية وتوسيع إمبراطوريتها

طلبت ألمانيا من العثمانيين التوغل عبر سيناء ومحاولة الحصول على قناة السويس فبكده يقدروا يشلوا حركة بريطانيا من و إلى مستعمراتها وأهمهم الهند لكن المحاولة فشلت فده أدى إلى تراجع الإمبراطورية وفقدها سيناء فخدوا من غزة موقع للدفاع عنهم

الشريف حسين وهو أمير مكة كان بيحلم بتكوين دولة مستقلة وهى المملكة العربية السعودية حاليا فكان عايز يتخلص من العثمانيين حتى لو تعاون مع الأجانب وقد كان أبعثت بريطانيا من يعرف بلورانس واللي أتعمل من قصته الفيلم المعروف لورانس العرب وبعد مجموعة من الحروب تمكنوا من طرد العثمانيين من المملكة

كان فى تعليق للورانس بعد الحروب مع العثمانيين وقال فيه "أنا لو مكان العرب مش هتدخل فى أى صراع لأن كل الوعود اللى خدوها وعود وهمية وهما مش أكتر من أدوات بنستخدمها لتحقيق أهدافنا" شفتوا بقى

كانت اليد الخبيثة وراء إقناع الشريف حسين بان يغزو الإمبراطورية وان تعترف بيه بريطانيا كدولة مستقلة وبالفعل غزت الجيوش العربية

ومعها الجيش البريطاني ومجموعة من الجيوش الفرنسية فلسطين وسوريا وأصبحت فلسطين بريطانية وسوريا فرنسية

إطماع العرب القديمة هي السبب في كل اللي إحنا فيه دلوقتى فبالتعاون مع بريطانيا أعطت اليهود المشتتين في كل بقاع الأرض الضوء الأخضر لإقامة دولتهم وللأسف كانت ألمانيا على بعد خطوات قليلة من تدمير الحلفاء في الحرب العالمية الأولى وان حدث ذلك لما عانيننا مما نعانيه حاليا

فالمعروف تاريخيا كره الألمان لليهود واعتبارهم اقل المخلوقات البشرية شأن معاهم حق والله فقتلوا في عهد هتلر بس تقريبا 6 مليون يهودي ده غير اللي الروس قتلوهم في الحرب العالمية الأولى

أنا هنا أتكلمت عن الجانب العربي في القضية الفلسطينية وان إحنا ساهمنا كتير في اللي بيحصل في ارض الموعد دلوقتى المرة الجايه هتناول الجانب الخاص باليهود والتخطيط الجبار للفكرة دى ابتدءا نمن القرن إل 16

التعصب الأعمى

2009-02-27T14:00:00.006+02:00

التعصب الأعمى

من تقريبا شهر ونص لما بدأت المذبحة فى غزة كتبت بوست أعبر فيه عن حزنى اللى كان ساعتها ميتوصفش فى قصيدة أسمها ( أبكى ) وتوقعت رد فعل كبير من الناس وقد كان لغاية ما وصلنى تعليق غريب جدا بالنسبة ليا ففى قلب المذبحة والناس بتتقطع وتموت متوقعتش ان يوصلنى تعليق زى ده وهو من اخت عزيزة وكان نصه

هو احنا الي هنحرر فلسطين !!! اكيد لا اذا اهلها طالعين منها وسايبنها لشوية يهود كلاب ومتفرقين في كل بلد كام الف ده بدل ما يتجمعوا كلهم في بلدهم ويحاولوا يعملوا ولو خطه واحده لتطفيش كم ولو لقليل من اليهود يعني هما يسيبوها واحنا الي هنظبطهالهم مش هما الي بيقولوا مصر اسوأ بلد وعميله مع امريكا وشعبها خاين تمااااااام خلي اليهود ينفعوهم وحماس مروقاهم

فكان ردى

اللى سابها سابها من بعد حرب 48 واللى حصل فيهم لكن بعد كده محدش طلع منها على العكس كل الفلسطينيين اللى سمعتهم بيقولوا مش هنسيبها الا اموات فهما لا بيهربوا ولا حاجه وبعدين حطى نفسك فى موقف ان بنات صحباتك بيكلموكى على واحده صاحبتك بطريقة وحشة وعمالين يطلعوا فيها العبر فطبيعى انك هتخدى موقف منها وده الحال مع الفلسطينيين فكل الناس بتشحنهم للاسف ضد مصر وكأن كل تاريخ مصر أختزلوه فى معبروالعيب هنا مش عليهم العيب على القيادات السياسية اللى شحنتهم وكمان العيب الأكبر على الأعلام اللى بقاله 5 أيام بيعيد كلامهم مع أن المعبر مفتوح من 3 أيام

بعد كده قالتلى لأ الناس بتسيبها دلوقتى مش بعد حرب 48 قلتلها انا معايا ما يثبت ان اللى سابها مشى منها بعد الحرب وبعد كده الفلسطينيين بيتكاثروا وده واضح بالأرقام

وبعدين دخل على الخط واحد صاحبها فأمن على كلامها من غير ما يقراه وهاجمنى بشكل شرس فكان ردى مدعم بمستند من موقع التاريخ والأحصاء الفلسطينى بس لا حياة لمن تنادى لقيت الأنسة سخنت علشان لقت الحيطة اللى تتسند عليها وهى صديقها فقالت

متهيألي العيب الاكبر من عيب الاعلام هو عدم أحترامك لأراء الاخرين أنت رأيك الحكومة تفتح معابرها واسرائيل لسه محتله غزة فده يدل على وطنيتك الواضحه جداااااااا جدااا انت لو مش خايف على مصر خاف على نفسك وعلى أهل بلدك اما بالنسبة لموضوع التزايد والنقصان فده موضوع اخر انت شايف المئات اللي بتموت كل يوم من فلسطين دي بتخلي عدد السكان يزيد ولا يقل !! لما كل يوم اسرائيل تقتلها متين تلتمية واحد اطفال وعجايز ستات ورجاله ده غير اللي بيطلع منها كل سنة على كل دولة شوية اذا انت عندك اثباتات ان عدد سكان فلسطين بيزيد فأعذرني فالقول"اللي بيحاول يقنعك بكده بيضحك عليك"الامارات نفسها بتجنس كل سنة الاف الفلسطنيين وتديهم جنسية الدولة ده غير قطر والسعوديه والكويت ومصركل ده وفلسطين بتزيد سبحان الله وأشكر مواطن مصري نايم على رده وبينلنا فعلا تناقدك الواضح في كلامك كلنا بنشكره وانا اولهم

فده كان اول أتهام ليا بعدم الوطنية والخيانة علشان بحاول أبين الحقائق وأوضح أن أحنا والفلسطينيين واحد ومينفعش كان نسيبهم يتدبحوا وأحنا قافلين المعابر وبنقول وأحنا مالنا فمحبتش أدخل فى مهاترات مع ناس مش عايزه تفهم وتستوعب وكمان كان فى حملة شرسة من مجموعة من المدونين على حماس والجهاد ويقولوا حرقهم الله والى أسفل السافلين وكلام زى ده وكان ده الوجه الأول للعملة وهو( الدفاع عن مصر وده صح ولكن وسيلة الدفاع بالهجوم على الفلسطينيين) وده اللى أنا رفضته

الوجه التانى من العملة أكيد كلكوا عارفينه وهو من معظم اللى مش مصريين ومن المعارضة المصرية الغاشمة

وهو(سب الحكومة ومصر فى كل النواحى والأوقات والأتجاهات وتغيير الحقائق ) مشفتش كده فى الدنيا والله فالمعارضة مفروض تتطرح فكرها بأحترام وبطرق شرعية مش عن طريق القنوات الفضائية

وكان فى مثال على ده مع أخويا وحبيبى رأفت الفلسطينى من غزة فلما قلت رأيى فى خضم الكلام عن جيفارا فى بوست لنا وقفة قلت رأيى فى الصواريخ الفلسطينية مجرد رأى لقيت هجوم شرس ومش طبيعى فللأسف أحنا مبقيناش نتناقش بقينا نتخانق مع العلم أن رأفت دلوقتى صاحبى وحبيبى

دعوة لوجهى العملة من التجرد من التعصب الأعمى لحزب أو وطن ولنفكر بعقلنا ونحكم بأنفسنا ولنتناقش فكل ما نحن فيه الأن سببه عدم النقاش وأصرار كلا منا على رأيه

حفظتكم السلامة

صباح التناقض

2009-02-21T14:17:00.002+02:00

صباح التناقض

هل ضعف ولا جبن ولا عدم ثقة ولا إيه بالضبط؟؟ كلام في سكة وأول ما تلف ضهرك يبقى الكلام في سكة تانيه خالص وإنا عن نفسي مبصفش الشخص اللي بيعمل كده غير بالضعف وعدم الثقة في نفسه وفى كلامه لأنه لو واثق في كلامه هيقوله قدام اى حد و في اى وقت

لكن انا هنا هتكلم عن تناقض فى التعاملات مع الناس واللى كتر اوى اليومين دول وده خلى من الصعب جدا جدا الحكم على اى شخص فى وقتنا ده فمش من موقف ولا كلمة بيبان طبيعة الشخص اللى قدامك ولكن لازم تعاشره وتحتك بيه فى كل حاجه علشان تعرفه وهأجل الأجابة عالسؤال اللى فوق لبوست تانى

أول اصطباحه في صباح التناقض حاجه تخص الحكومة ففي الوقت اللي في وحدة في كل قسم اسمها وحدة الآداب فبنقول كتر خيرهم والله بيحمونا من شياطين الأنس دول بس وعلى النقيض بنلاقى سماح الحكومة بالكباريهات والملاهي الليلية اللي بيحصل فيها اعذروني أوسخ من اللي بيحصل في شقق الدعارة مش بس كده لأ والشرطة كمان كتر خيرها بتحمى الأماكن دى فمينفعش غير إننا نقول صباح التناقض

تانى اصطباحه هي بخصوص الحاج اللي راح السعودية وهو مش في دماغه الحج لكن رايح يغير جو واللي يضايقك إن اللي بيقوله يا حاج ده عارف انه خمورجى وبتاع نسوان ومرتشي وسباب للدين لكن يقولك لو كلمته ده حاج طبعا مش راح السعودية يبقى حاج طبعا ربنا يكتبهالنا و صباح التناقض

تالت اصطباحه هي متعلقة بالولد أو البنت المؤدبين والمحترمين واللي أخلاقهم عالية بس للأسف الصفات دى بتبقى قدام الناس بس ولكن أول ما يرجعوا للبيت ويقعدوا قدام جهاز الكمبيوتر أعذرونى في اللفظ بيتحولوا لحيوان وحيوانه كل هدفهم إنهم يشبعوا غرائزهم ويفضوا ما يعرف بين العالم التعبانه بالكبت بيفضوه عن طريق فيلم ولا أتنين بورنو واللي يضايقك اكتر إن بعد ساعات الناس دى بتكلمك في الدين معلش أعذرونى على الاصطباحه دى بس بجد الموضوع انتشر أوى أوى والناس بتسأل دلوقتى على الأفلام البورنو اكتر ما بتسأل عن الأفلام العربي لنا الله وصباح التناقض

رابع اصطباحه متعلقة بما يعرف بجماعة الأخوان المسلمين المحظورة على رأى حكومتنا فمنين أنتوا سايبنهم يدخلوا الأنتخابات التشريعية وغيرها ومنين هى محظورة ده مالوش غير تعليل واحد ان الشيوخ دول لو زودوها يبقى حق الحكومة تلملم فيهم زى ما بتلملم في الكلاب الضالة من الشوارع فانا اعرف إنها لو محظورة هتبقى على طول الخط أو لأ ده طبعا في الدول المحترمة وصباح التناقض

أخر اصطباحه متعلقة بأخواتنا بتوع الأمر بالمعروف والنهى عن المنكر فى السعودية وللأسف الناس دى متعرفش ومبتفكرش فى الأيه دى غير مع المصريين فأول ما يشوفوا واحده مصرية مش محجبة فى الشارع ياويلتااااااااه على اللي بيحصلها لكن طبعا اللبنانيات والتوانسه والأجانب حاجه تانيه حتى لو مشيوا عريانين بيحسسونى أن الجمعية بتاعتهم أسمها أمر المصريين بالمعروف ونهيهم عن المنكر ولنا ولكوا الله يا من تبحسون عن الرزق في الدول العربية

وصباحنا وصباحكوا ماليان بالتناقض
ولسه فى اصطباحات كتير

ولنا وقفة

2009-02-14T13:43:00.004+02:00

ولنا وقفة

أحدى مشكلاتنا الحقيقية هي في إننا بندى أراء و أحكام على ناس وعلى حاجات ممكن منكنش شفناها أو نعرف عنها اى حاجه فبقت عملة نادرة إننا نلاقى شخص يقول ماأعرفش

في الفترة الأخيرة سمعت كلام كتيروشفت صور اكتر لشخص معرفش عنه حاجات كتير اللي يقول عليه كافر واللي يقول عليه الملاك الذي عاش بين البشر واللي يقول يهودي وابن خالة شارون وصوره اللى ماليه التيشيرتات والمطاعم والمنتجات وكل حاجه فقررت أقرى و أشوف أفلام متعلقه بيه علشان أعرف عنه أكتر

عرفت تقريبا حاجات كتيرة عن الشخص ده وهو ( أرنستو تشى جيفارا ) بس هنا هقول على الحاجات والمقولات اللي شدتني بما إنها مقولات وحاجات مش عاديه قمة التناقض ان جيفارا كان من أشد المحاربين للنظام الرأسمال مش بس كده ده كمان تقريبا كان الشخص الوحيد اللى وجه كلام لأمريكا في الأمم المتحدة ميقدرش أي سياسي دلوقتى يقوله في سره التناقض في إن الشركات الرأسمالية بتضمن بوضع صورته على أى حاجه وفى اى حاجه مبيعات جبارة بغض النظر عن جودة المنتج

مقولة ليه لما قرتها ثبتتني في مكاني وهى لما طلب منه شخص في وزارته أجازة وسأله (تقدر تستغني عنى؟؟) فكان رده "لا يوجد شخص في الحياة بالأهمية التي تجعلنا لا نستغني عنه ولا يوجد شخص عديم الأهمية كليا" فعلا ففي ناس بنعتقد إن الحياة متقدرش تكمل من غيرهم بس عادى بتكمل بغيابهم ومفيش حاجه بتتغير

وبما إن موضوع غزة في دماغي وهيفضل في دماغي فكان رأى جيفارا زى رأيي أو طبعا العكس بمعنى إن أنا كان ليا نفس الموقف والرأي اللي قاله وهو "على المجتمع الذي يريد أن يتخذ طريقه نحو التغيير يلزم عليه إن يحدد طبيعة وشكل القوة القادرة على إحداث هذا التغيير" مقلناش منقاومش بس أقاوم صح مش اضرب صاروخ ولا اتنين لا يودوا ولا يجيبوا لازم أعرف أنا عايز ايه وازاى أوصله

بالبحث لم أجد أى وثيقة مؤكدة تثبت إن جيفارا له صلة بالأحمق شارون كل ما في الموضوع إن هناك مقال يحكى إن ام جيفارا يهودية انتقلت للأرجنتين وهناك غيرت اسمها واتجوزت وخلفت أرنستو ده مجرد مقال غير مؤكد. وبالنسبة لموضوع الشيوعية فكان كل فكر جيفارا في الثورة ونصر الفقراء وبعد كده لما أتجوز هيلدا وهى شيوعية واديتله كتب يقراها عن الشيوعية والماركسية لقي إن هدفه هو نفس فكر الماركسية الشيوعية فمن هنا أطلق عليه الناس أنه شيوعي وده يثبت إن فكره اتفق مع الشيوعية مش هو أصلا كان شيوعي وحاول ينفذ المنهج الشيوعي.

"لا يستطيع المرء من إن يكون متاكدا من إن هناك شئ يعيش من اجله إلا إذا كان مستعد للموت في سبيله" مقولة أخرى رائعة فعلا وهو ده المفروض إن يبقى في هدف لكل إنسان في حياته لازم يوصله مهما كانت الصعوبات.

أنا شايف إن اللي ميز جيفارا عن باقي مجموعة الثورة الكوبية وعلى رأسهم القائد فيدل كاسترو وفرانك بايس وراؤول وفيلما وخلاه خالد في ذاكرة الناس انه كان بيحارب الظلم والديكتاتورية فى ارض مش أرضه بما انه ارجنتينى وكمان مكتفاش بالثورة دى لكن ذهب للجزائر وغيرها وكمان بوليفيا اللى اتقتل فيها وبما انه كان دكتور فكان بيعرف يكسب ود الناس وده زود من أسهمه كتير.

الكلام عن الشخص ده كتير ومقولاته أكتر أنا هنا قلت رأيي وقولت بس عن المقولات اللي شدتني اللي عايز يعرف عنه اكتر يقرى عنه و يشوف فيلم تشى بجزئيه

بجد كنت بحسبه حاجه وطلع حاجه تانيه خالص وطلعت بعظة ليا وليكوا وهى انه مينفعش نحكم على حد غير لما ندرسه صح الأول

أخمدوا النيران وأنهوا المحرقة

2009-01-31T14:19:00.002+02:00

أخمدوا النيران وأنهوا المحرقة

هم من أعلنوها حرب وهم من أنهوا هذة الحرب
هم من أمروا بالتوغل البرى وهم من أعلنوا عن سحب القوات
هم من تأسس مجلس الأمن لبحث قضيتهم وهم من لم يسمعوا لقرارته
هم من يبكى الناس حين يسمعوا عن محارقهم وهم من يحرقوا كل شئ أمامهم
هم من يخططوا لكل شئ وهم من يسخروا الناس لتنفيذ مخططاتهم

هذة ليست لعبة أستراتيجية بل هذا الواقع الذى عشناه فى محرقة غزة

كم أنتى قاسية أيتها الحياة؟؟؟
كم أنتى ظالمة أيتها الحياة؟؟؟
كم أنتى دانية أيها الحياة؟؟؟

من هو صاحب اليوم لا تضمن أستمرار صحبته لأما لتغيرات منه أو لتغيرات منك أو لظروف أشد منكما
من هو حليف اليوم لا تضمن تأييده لك فى قادم الأيام
من هو حبيب اليوم لا تضمن ألتهاب هذا الحب فى قادم الأيام بل من المحتمل أن يخمد هذا الحب

كيف كنا بالأمس القريب حلفاء والأن أصبحنا كما تروا

لن أتطرق للحديث عن العدو فهم لا يستحقون العناء فى كتابة أى حرف عنهم بل سأتحدث عن الحل الأساسى والرئيسى لكل ما نحن فيه من مشاكل

عندما أخاف على كل بنت تسير بالشارع وأحرص عليها كما أحرص على أختى وعندما تتقى كل بنت الله فيما تلبسه هنا تحل المشكلة

عندما لا أرضى عن أى منكر يحدث أمامى وأقول كلمة حق لأنهى هذا المنكر وأن لم أستطع أن أقول هذة الكلمة أبتعد عن هذا المنكر حتى ولو خسرت صديق من جراء هذا فلا طاعة لمخلوق فى معصية الخالق هنا تحل المشكلة

عندما أراعى الله فى عملى وأذهب وأغادر فى مواعيد العمل ولا أحصل على أى شئ من العمل ليس من حقى هنا تحل المشكلة

لماذا ضربت هذة الأمثلة ؟؟ لأبين أن حل أى مشكلة يبدأ من صاحب هذة المشكلة

حل أى مشكلة يبدأ من صاحب هذة المشكلة وبما أننا نحن أصحاب كل هذة المشاكل فيجب أن نبحث عن السبب لكل ما نحن فيه والسبب واضح حتى لمن لا يرى

وهو التفرق

تفرق فى سياستنا
تفرق فى لهجاتنا
تفرق فى ثقافتنا
تفرق فى معاملتنا بعضنا لبعض
حتى التفرق فى الأرض صاحبة المشكلة الحالية ( الأرض الطاهرة ) وطهارتها نابعة من كم الشهداء والدم الطاهر الذى ينزف منهم فى كل وقت

ماذا تريد فتح وحماس؟؟ هل تريد المزيد من سفك الدماء وقتل الأبرياء؟؟ كفاكوا صراع من أجل السلطة فكل شئ فى زوال ولن يبقى الا سؤال ربك ماذا فعلتوا من أجل وطنكم؟؟

ماذا تريدى ياقطر؟؟ هل تريدى أن تصبحى الدولة المحورية فى الشرق الأوسط؟؟ عفوا فهذا دور محجوز مسبقا ولن يستطيع أحد نزعه من مصرنا

ماذا تريد القنوات الأخبارية العربية كالجزيرة والعالمية ؟؟ هل تريد تمهيد الطريق لدولها لتكون هذة الدول هى الرائده؟؟ عفوا فالمشاهد العربى على وعى كامل بكل صغيرة قبل كبيرة ولن تدخل علي مثل هذة الألاعيب

ماذا تريدوا يامعارضين مصر ؟؟ هل تريدوا الأساءة لسمعة مصر ؟؟ عفوا فلن تسيئوا الا لأنفسكوا فما رأيت قط فى أى دولة من الدول معارضة محترمة تتحدث بهذا الأسلوب فهذا يدل على ضعف حجتكم فلم تجدوا طريق لعرض أرائكم الا بالحديث السئ عن الحكومة

عندما تستطيع هذة الجهات الأجابة على هذة الأسئلة وتكون أجاباتها مقنعة للجمهور العربى عندها فقط يمكن أن نضع أيدينا على الحل

هل تعلم 2 ؟؟؟؟

2009-01-22T14:40:00.002+02:00

هل تعلم 2 ؟؟؟؟؟؟؟؟؟؟؟؟؟

هل تعلم أن متوسط ما يقرأه الأوروبى فى السنة 35 كتاب؟؟؟

هل تعلم أن متوسط ما يقرأه اليهودى فى السنة 42 كتاب؟؟؟

هل تعلم أن متوسط ما يقرأه العربى فى السنة كتاب واحد لكل 80 شخص؟؟؟

يعنى كل 80 بيجمعوا من بعض علشان يشتروا كتاب

هل تعلم أن ثقافة الأوروبى تعادل ثقافة 2600 عربى؟؟؟

هل تعلم أن ثقافة اليهودى تعادل ثقافة 3200 عربى؟؟؟

هل تعلم أننا لا نعلم حقيقة تاريخنا بل كل ما نعلمه ما يريد أن يوصله الغرب وأعدائنا اليهود لنا؟؟؟

هل تعلم أنه لكى تنتصر على عدوك يجب أن تقرأ فى تاريخه وتعلم عنه كل صغيرة قبل الكبيرة؟؟؟

هل تعلم أن فعاليات معرض الكتاب قد بدأت بالفعل؟؟؟

خارج الأطار: أنتهت مذبحة غزة وكسائر المذابح لن نخرج منها الا بعقد مجموعة من القمم الوهمية وستضاف الى التاريخ الكبير والقائمة الطويلة من المذابح بل أنها تأتى فى المرتبة الثانية من حيث عدد الشهداء بعد مذبحة صبرا وشتيلا

لن أصمت وسأظل أتحدث ولن أنساكى ياغزة ولن أنساكى يافلسطين

دعوة لكل من يقرأ هذا البوست بالقراءة وخصوصا القراءة فى تاريخ عدونا لكى يعرف المزيد والمزيد من حقائقه

لكى الله ياغزة

2009-01-08T09:54:00.013+02:00

مع الأقتراب من الألف شهيد

غزة عندهم مش أكتر من كده

س/ هل نجحت أسرائيل فيما تهدف اليه من هذة العملية؟؟ورأيكوا أيه الحل علشان ترجع كرامتنا وهيبتنا فى المنطقة كعرب بس ياريت يبقى حل مش حلم بعيد المنال؟؟

جاوبونى وهنشر كل حل تقترحوه وتعليقى عليه

.....................................

أول حل من احساس لسه حى

هو حل المقاطعة بس يبقى عام وشامل لكل حاجه مش واحد يقاطع المنتجات بتاعتهم وهو فى أيده سجارة ملبورو أو غيرها وهو عارف أو مش عارف أن صاحب الشركة يهودى بيدعم أسرائيل يوميا بفلوس العرب

تانى حل من ابى

حل جامد قوى بتقول الضغط الأعلامى بس أنا فى أعتقادى أن الضغط الأعلامى على أشده ده بالنسبة للأعلام العربى لكن مهما كان فى ضغط ولا هيجيب نتيجة لأن أكيد الأجانب مش هيشوفو الأعلام بتاعنا لكن هيشوفوا أعلامهم المضلل وأقتراحى أن أحنا اللى نشتغل ونحاول نوصل الحقيقة لأكبر عدد من مستخدمى النت الأجانب والموضوع ده جاب نتيجة فى أن لجنة حقوق الأنسان فى جنيف بالنمسا أعتبرت اللى بيحصل ده جرائم حرب وطلبت من القيادات السياسية هناك أتخاذ موقف سياسى عنيف ضد أسرائيل

تالت حل من من غير عنوان

بيقول أن أحنا نجهز ولادنا واللى أنا فهمته أن قصدها أن أحنا نجهزهم عسكريا وده طبعا مش فى أيدينا لكن اللى فى أيدينا أن أحنا نخلى كره أسرائيل و أمريكا فى دمهم يتنفسوا كره ليهم هو ده اللى فى أيدينا

رابع حل من كيمت

بتقول

لازم نكون احرار الاول والحريه نابعة من جوانا والحرية انك تقدر تقول لنفسك سلبياتها وتحاول تصلحها وأن كل واحد يرضى ربنا فى عمله جميل الكلام ده بس لو فعلا حصل أنا متأكد أن مش قضية فلسطين بس اللى هتتحل لأ ده أحنا هنبقى القوة العظمى الأولى فى العالم علشان هو ده سبب كل حاجه أحنا فيها دلوقتى للأسف قليل اللى مبيقبلش رشوة وقليل اللى بيتقى الله فى شغله بس برده لازم كل واحد يحاول يشتغل على نفسه

كلام كبير

2009-01-02T20:32:00.008+02:00

كلام كبير

أبحث فى الناس عن مزاياهم وأبحث فى نفسك عن عيوبك تكن أحكم الناس....وأنظر دائما الى الجانب المبهج فى الحياة وتعامى عن الجانب المؤلم تكن أسعد الناس

حكمة قالها الشاعر الهندى طاغور ولكن عند التعمق فيها وفهم كل كلمة منها نجد انها المفتاح السرى للسعادة و الحكمة فى الحياة

كثيرا ما ننتقد الأخرين والغالب أن هذا النقد يكون من خلف ظهورهم فللأسف نغتابهم وكذلك أنا أسف على أن أكون واحد من هؤلاء المنتقدين الا انى أحاول أن أطهر نفسى من هذة العادة وبسؤال سألته لنفسى بماذا يفيدنا هذا النقد للناس؟؟ لا يفيدنا الا بتكوين فكر معين عن هذا الشخص وهذا الفكر يؤثر بالسلب بالطبع فى تعاملى معه بالأضافة الى أنه يخلق فواصل وحدود فى تعاملى مع هذا الشخص

لكل أنسان منا مميزاته مهما بلغت عيوبه أقصى حجم لها فالله بجلاله وعظمته لم يخلق أى منا كامل فالكمال لله وحده فلو وضعنا مميزات هذا الشخص نصب أعيننا وتعاملنا معه فى حدود هذة المميزات سنستفيد من محبته وأشياء أخرى ستأتى فيما بعد

مثال: شخص مثقف لكنه بعيوبه الكثيرة مثل حب النفس وعقله الصغير وكذبه فى بعض الأحيان بهذة الصفات تنفر منه الناس ولكن ماذا سنخسر اذا أستفدنا من ميزته الوحيدة تقريبا وهى أنه انسان مثقف فكانت حدود تعاملى معه ليس أكثر من مناقشة تقافية ليس أكثر ففى هذا الوقت سوف أستفيد من ثقافته وسأكسبه ولن أخسره كزميل أو صديق ولكن بحدود

وبعدين ( أحنا مين ) علشان نحكم على الناس ونصنفهم ونحدد مميزاتهم وعيوبهم فمن يدرى فقد يكون العيب فيك أنت ليس فى الشخص الذى تحكم عليه

رائع أن ننظر الى الجانب المبهج من الحياة ولكن من منا يفعل ذلك؟؟ للأسف عند حدوث أى ضائقة أو مشكلة لأى أنسان فتصيبه حالة أكتئاب وأصبح الأن الأكتئاب منتشر فى مجتمعنا حتى وأن لم يكن هناك مشاكل

للأسف لا نفصل فى حياتنا بين الأشياء و بعضها فمن المفروض أن نمارس حياتنا الطبيعية الى أن يحين وقت حل المشكلة ونحاول حلها فاذا وفقنا فى حلها فذلك بتوفيق من عند الله واذا لم نستطع فكفانا المحاولة

اذا أستطعنا تطبيق هذة الحكمة فى حياتنا ستتغير حياتنا بشكل غير طبيعى

وفى النهاية أسهل ما على الأنسان أن يحل مشاكل الناس معتقدا بذلك انه يفهمهم ولكن فى الحقيقة هو لا يفهم نفسه

أبكى

2008-12-28T12:50:00.004+02:00

لكى الله ياغزة
لك الله يافلسطين

أبكى

أبكى وسأظل أبكى على أخواننا الشهداء
على عدوان ليس له هدف
سوى سفك الدماء
ماذا عسانا أن نفعل؟؟
سوى الصبر على هذا البلاء

أبكى وسأظل أبكى على أنقسام العلماء
أحدهم يصافح يهودى
والأخر يأخذ لفلسطينيا عزاء
يدافعوا عن من صافح عدونا
وكأنه فى جنة الخلد مع الأنبياء
وما هو الا أهوج
العربى واليهودى عنده سواء
واذا سمعتوا حجته
لن تصنفونه الا ضمن الأغبياء

أبكى وسأظل أبكى على فتح وحماس
واذا تعمقت فى صراعتهم
لن تجد لها أى أساس
سوى حب النفس وحب السيطرة
حتى اذا كلف ذلك أرواح الناس

أبكى وسأظل أبكى على عجزى
وعدم أستطاعتى عمل شئ
أنا والكل كذلك مثلى
ليس أمامنا الا عمل مظاهرة
وعندها سيصدر أمر ضدنا فورى
بالله عليكم ماذا نفعل؟؟؟
قولوا لى حتى أحقق نصرى
على عدو الله وعدونا
حتى يبرد دمى الذى يغلى

أبكى وسأظل أبكى على حالنا
كعرب نتعصب لأشياء ليس لها معنى
أستحلفكوا بالله أن نتعصب لنمحوا ذلنا
الذى عشناه عقودا عددا
وأن نطهر قلوبنا ونقتل حقدنا
أما ان الأوان لننظف نفوسنا
أم ننتظر أن يأتى العدو عندنا؟؟

أبكى وسأظل أبكى كلما أسمع شجب
نشجب هذا الأعتداء
جملة قالها كل كلب
ليس عندهم وقت
سوى للسلب والنهب
ومن يعترض على قرارا لهم
يكافئوه بل يعاقبوه بالحجب

أبكى وسأظل أبكى وسأظل أبكى
مادام ليس بيدنا شئ سوى البكاء
وكل ما فى أستطاعتنا هو ألقاء جزمة

كفايانا تجارب

2008-12-25T13:32:00.003+02:00

كفايانا تجارب

زهقت من كتر ما بسمع فى برامج كتير كلمة التجربة
ال؟؟ أى حاجه بعدها لدرجة أن أنا سمعت مرة مسئول بيقول التجربة الماليزية والتايلاندية يانهار أبيض للدرجة دى التجارب شحه عندنا ده أحنا حتى ما أكتر العلماء عندنا

الله يجزيك يازعيم أنت اللى أبتديت موضوع التجارب ده بفيلمك

دولة زى تونس على عينى ورأسى بس مش كل ما أسمع مسئول يوجع دماغنا بكلمة التجربة التونسية فى السياحة ماشى عدناها هما أحسن مننا بكتير والتوانسة المهجرين فى أوروبا بيساعدوا عالموضوع ده وفى الكورة ماااااااااااشى مع أننا أتفوقنا عليهم دلوقتى على مستوى المنتخب والأندية بس لسه بيقولوا التجربة التونسية لكن لما يوصل الموضوع أن الوزير اللى أنا عن نفسى بحترمه وشايفه من أكتر الناس المثقفة اللى مسك منصب ريادى وهو سامح فهمى لما توصل بيه ويقول التجربة التونسية واللبنانية كمان فى مجال البترول ودعمه معلش نقف هنا

أنا اللى متأكد منه أن أحنا أحسن عقول فى البلد دى شغاله فى مجال البترول واللى مش مصدقنى يروح أى شركة بترول أيا كان مجالها ويشوف مستوى الناس اللى فيها على صعيد المستوى المادى والأجتماعى والثقافى بعد ده كله بنقول التجربة كذا بدل ما أحنا نصدر التجربة بتاعتنا حاجه صعبه شويه مش كدا؟؟
حلو ان أحنا نشوف أيجابيات الدول اللى حولينا لكن مش حلو أن أحنا نقول كلمة التجربة لمجرد قولها فلو مش هنعمل بيها ومتناسبناش ملهاش لازمة أن أحنا نقولها أحسن تتحول لهسهس ونقعد نقولها وأحنا نايمين

فى النهاية أحب أشيد بالمهندس الوزير سامح فهمى اللى الصراحة هو المسئول الوحيد فى الدولة اللى بيشدنى أن أنا أقعد قدامه وبيثبتنى فى كل حاجه بيقولها لأن كل كلمة بيقولها مبنيه على أساس علمى وفكر عالى الكلام ده والله بجد مش علشان أنا فى مجال البترول فحتى لو كنت بعيد عن المجال ده كنت هقول كده

هل تعلم؟؟؟

2008-12-23T01:43:00.004+02:00

هل تعلم

هل تعلم أن عدد شركات السياحة فى مصر 1200 شركة؟؟

هل تعلم أن الحج المصرى هو أغلى حج على مستوى العالم؟؟

هل تعلم أن سعر الحج من أستراليا يبلغ تقريبا ما يعادل 28 ألف جنية شامل الطيران على طيران الأمارات؟؟

هل تعلم أن الشركات المعنيه بجلب السياح لمصر تقريبا 200 شركة فقط؟؟

هل تعلم أن باقى الشركات الألف تكتفى بدور الكومبارس ولا تعمل الا فى موسمى الحج والعمرة؟؟

هل تعلم أن عدد تأشيرات الحج لمصر يبلغ 80 ألف تذكرة نصفهم قرعة والباقى سياحة؟؟

هل تعلم أن النظام المتبع فى مصر لتوزيع التأشيرات على شركات السياحة نظام حصص أى أن كل شركة تملك رقم معين من التأشيرات؟؟

هل تعلم أن الشركات السياحية الصغيرة تبيع تأشيراتها للشركات الكبيرة بمبلغ يصل ل20 ألف جنية للتأشيرة الواحدة؟؟

هل تعلم أن التكلفة التى يتحملها الحاج تزيد ب20 ألف جنية عن التكلفة الحقيقية أى أننا لانبدأ من الصفر بل نبدأحساب التكاليف بداية من ال20 ألف جنية؟؟

هل تعلم أن الخدمة التى تقدمها بعض شركات السياحة من أسوء الخدمات مقارنا مع الأسعار؟؟

طبعا أكيد فهمنا أيه السبب فى غلو أسعار الحج بصورة خياليه وذلك نتيجة لنظام الحصص الفاشل

أقتراحى أقترح أن كل شركة تقوم بعمل برنامج لها وبناءا على عدد الحجاج الذى يرغبون فى الحج مع شركة معينه يتم توزيع التأشيرات وهذا يضمن أن كل التأشيرات ستذهب فعلا للشركات التى تقوم بعمل برامج وليس للمتجارة فى التأشيرات على حساب الحجاج

لا لتصدير الغاز لأعدائنا

2008-12-15T10:50:00.005+02:00

من فترة طويله من 6 أو 7 شهور كنا عاملين حملة موضوع وقف تصدير الغاز لأسرائيل لما كان الموضوع لسه طالع ولسه بعض المناهضين لموضوع التصدير واخدين حكم من المحكمة بوقف تصدير الغاز لليهود بس ده لسه حكم أولى أكيد الحكومه هتخش تطعن ووزارة البترول كمان

الموضوع مش موضوع أن أحنا بنصدر الغاز لأسرائيل بثمن قليل ولا كبير الموضوع أن مفروض يبقى عندنا وفاء وأعتراف بالجميل ونفتكر الدول العربيه عملت معانا أيه فى حرب أكتوبر لما كلها أتكتلت ورفضت تصدير البترول للدول المسانده لأسرائيل مع أننا زى ما بنقول هو ده لقمة عيشهم ورأس مالهم الوحيد فى هذة الفترة

المشكلة هى لما نعرف احنا عندنا غاز أد ايه ويبلغ الغاز الموجود فى مصر بالأحتياطى المؤكد 70 تريليون متر مكعب من أصل 6 ألاف تريليون يعنى نسبتنا من الغاز العالمى تقريبا 1.1 % أنتوا شايفين النسبة دى كفايه علشان نصدر؟؟؟

بقالى فترة حاسس أنه موضوع أسرائيل عادى مش فارق مع الناس يعنى واحد يقولى لو الأهلى بيلاعب تل أبيب هشجع تل أبيب والتانى يقولى ده أنا أصاحب يهودى ومصاحبش الواد ده فى أيه ياجماعه أحنا مالنا بقينا كده دى أسرائيل ودول اليهود اللى قتلوا أبهاتنا وأخواتنا ياريت نفكر فى الكلام اللى بنقوله ولو للحظه قبل ما نقوله

للأسف أنا سامع كلام أن المنتخب الأسرائيلى للشباب جاى البطولة اللى هنظمها السنه الجايه وللأسف البلد اللى هيتحرقوا يلعبوا فيها هتبقى ثكنه عسكريه وأنا متوقع أنهم يمنعوا دخول الجماهير فى ماتشاتهم ولنا الله

عايزين ياجماعه نرجع تانى ونسخن ونقول لا لتصدير الغاز لأعدائنا وعايزكوا تشاركوا معايا بأرائكم علشان نوصل الموضوع لأكبر قدر من الناس وأول حاجه هنعملها نحمل اللوجو ده ونحاول نوصله لأكبر عدد من الناس

حمل اللوجو من هنا
http://www.zshare.net/image/12105759293805bb/

وجزاكم الله كل خير

عجبى

2008-12-12T16:40:00.004+02:00

عجبى

عجبى على زمن بنخون فيه الأمين وبندى أمان للخاين
عجبى على زمن بنسمع فيه الكداب وبنطنش الصادق
عجبى على زمن بنعظم فيه للهلاسين وبنفض فيه للموعظين
عجبى على زمن نسينا فيه دينا وضيعنا فيه مالنا

مساء الفل عليكوا وكل سنة وأنتوا بخير ياارب وصحة غريب اوى الزمن ده الواحد بيعمل حاجات عفويه طالعه منه من غير ما يحسبها لكن بعد كده يندم ألف ندم دلوقتى صعب تعرف اللى قدامك ايه ظروفه دلوقتى مع احتكاكى مع ناس كتير عرفت انه زى ما بنقول اللى تفتكره موسى يطلع فرعون لكن هل أحنا نقدر كل ما نقابل موقف فى يومنا نقعد نحسبها ولا نتصرف على فطرتنا وزى ما تيجى تيجى؟؟؟؟؟ سايبلكوا الأجابه على السؤال ده

معصبنى أوى بقالى فترة موضوع كده وهو أن الناس بقت هلاسه وبتعشق الهلس يعنى بمعنى أصح أدينى فى الهلس أى كلام أهبل يتقال تلاقى الناس متجاوبه معاه لكن لما ييجى واحد يقول كلام محترم أو هيفيدك تطلع أفيهات ولا أحلى أنت هتتفلسف علينا ياعم روح أتعالج لا اله ال الله وده من ايه مش ده اللى بيحصل وخير دليل على ذلك الأغانى والأفلام الهابطه اللى ماليه الدنيا

أخر حاجه علشان مطولش عليكوا حد يقولى ياجماعة ايه اللى يفرقنا عن أوروبا وامريكا مش الدين برده طب لو ضيعنا دينا يبقى احنا فين بالظبط أيوه فى الضياع صح كده ولا عندنا أمانتهم ولا أخلاصهم فى العمل ولا أى حاجه فديما هو الحاجه الوحيده اللى باقيه لينا على أمل أن لما نقرب من ربنا نغير البلاوى اللى مليانا

بوست كئيب شويه بس كنت عايز أقول الكلمتان دول الصراحه كانوا زانقنى

المشكلة مش فى الزمن المشكلة فينا أحنا

الصكوك

2008-11-24T17:01:00.002+02:00

السلام عليكم

بالنسبة لموضوع الأسهم اللى وجعين دماغنا أنهم هيوزعوها على من بلغ سن الرشد وأطلقوا عليها (الصكوك) أنا كنت ناوى أرد على أسئلتكم على أساس أنكوا عندكم خلفيه عن الموضوع بما أن محمود محى الدين وزير الأقتصاد كل يوم فى برنامج شكل بس الناس طلبت منى أنى أحكى الموضوع من الأول فعينيا ليكوا

الأول أكيد شفتوا فيلم عايز حقى يعنى حاجه زى كده اللى احنا هنتكلم فيها بس الفرق الوحيد أن هانى رمزى فى الفيلم كان بيبيع للفرد تقريبا بمليون لكن حكومتنا هتدى للفرد فى حدود 400 او 500 جنية على شكل صكوك

من المعروف أن فى شركات كتير تخص الدولة تدور أسهمها فى البورصة فعلشان نحسب نصيب الفرد كام لازم الأول نعرف الأجمالى كام ونقسمه على 41 مليون (من بلغوا سن الرشد) الحج محمود محى الدين قال هيقسموا الشركات لأربع أقسام أول قسم مش هيدخل بحجة أنه بيخسر نعديها والتانى للشركات ذات الأهمية الأقتصادية هيخصصوا منها للموضوع ده تقريبا 30% والتالت للشركات الوسط هيخصصوا منها 49% والرابع للشركات اللى مش فارقه معاهم وهيخصصوا 69% بحساب نسب الأسهم فى الشركات دى وقسمتها على ال41 مليون هيطلع نصيب الواحد فى حدود 500 جنيه

هى دى القصه وما فيها

رؤيتى الشخصيه دلوقتى ياجماعه اللى عايز يدخل البورصه لازم الأول خالص يشترى أسهم فى حدود 25 ألف جنية علشان أى شركة سمسرة تقبل تبقى الوسيط بتاعه فعلشان حضرتك تقدر تتصرف فى الأسهم اللى ب500 جنية بتوعك لازم تكود فى البورصة بس أكيد بدل ما هتبقى 25 ألف هتقل كتير وأنا أتوقع أنها تبقى فى حدود 5 ألاف جنية

بس كده حد فاهم حاجة؟؟؟؟؟؟؟؟

وحشتونى

2008-11-17T18:17:00.005+02:00

بجد وحشتونى ووحشتنى المدونة وأنا أسف للتأخير الكبير أوى ده بجد الفترة اللى فاتت كنت مفتثدكوا ومفتقد المدونة لكن أهو رجعتلها تانى

اللى عنده أى سؤال بخصوص موضوع الأسهم التى ستقوم الدوله بتوزيعها يتفضل وأنا أن شاء الله هجاوبه

The Dark Knight

2008-09-23T13:45:00.004+02:00

The Dark Knight
فيلم يستحق المشاهدة

من الصعب فى هذة الأيام أن يتم أنتاج فيلم ينافس الثوابت التاريخيه فى السينما العالميه

ولكن هذا الفيلم للمبدع كريستوفر نولان غير هذة النظرية فالرائع نولان مع قلة أفلامه فهى لا تكاد أن تعد على اليد الواحده ولكنها أفلام فى غاية الحرفيه السينمائيه فبعد الرائعه

The Prestige

جاء وبعد غياب عامين ليسحرنا برائعة أخرى وما يميز هذا المخرج القدير أنه يخرج أفلام تشويق تترشح للجوائز العالميه وذلك للحنكة الأخراجيه التى يتميز بها وكان من المتعارف أن أفلام الدراما الأجتماعيه هى أفلام المهرجانات كما يقال عنها ولكنه أستطاع أن يغير من هذة الفكرة

نأتى الى فلمنا الذى أستطاع أن يلفت نظر كل متابعى السينما الأمريكيه وذلك لتربعه على قمة أفلام السينما الأمريكيه لفترة لم تقل عن 3 أسابيع متخطى أفلام لها باع طويل فى السينما الأمريكيه كالأب الروحى وملك الخواتم الفيلم حقق أيرادات لم تتحقق فى السينما العالميه منذ سنوات وسنوات فقد تجاوزت أيراداته حول العالم المليار دولار

المخرج المبدع نولان فى هذا الفيلم أستطاع أن يحقق المعادلة الصعبه وهى الربط بين الأكشن والدراما بجانب عدم التوقع لما يمكنى حدوثه بعكس أفلام الأكشن التى غالبا ما تتوقع ماذا سيحدث بعد دقائق ولكن هذا الفيلم غير هذة القاعدة وبين أنه بمخرج واعى تستطيع أن تنتج فيلم أكشن يمكنه المنافسه على الجوائز العالميه

أكثر ما شدنى فى هذا الفيلم هو المشهد الذى أستطاع باتمان فيه بالأمساك بزعيم التجار فى هونج كونج وأستطاع فيه أن يصعد به الى الطائرة وهى متحركه فكان هذا بالنسبة لى من أفضل المشاهد فى الفيلم وكذلك ما كان يميز هذا الفيلم هو الأختيار فالرائع الذى قام بدور الحانوتى الراحل هيث ليدجر كان دائما يضع الشرطة وباتمان فى مرحلة الأختيار

ما يؤخذ على الفيلم الجزء المتعلق بالعملة الذى كان يستخدمها الشرطى بعد موت حبيبته وذلك لأختيار اذا ما كان سيقتل من أمامه أو لا مما يعنى أنه كان يترك الحظ وحده يحدد ما اذا كان الذى أمامه سوف يعيش أو يموت فهذه الجزئيه بالتحديد قد سبق تناولها فى فيلم ( نو كانترى فور أولد مين ) أى أنها لم تكن أكثر من تكرار فى هذا الفيلم ولكن ما يشفع له أن الفيلم أنتهى منذ فترة تتجاوز العام أى قبل عرض الفيلم الأخر

فى المجمل هذا الفيلم يستحق المشاهدة فمن الصعب أن ترى فيلم فى الفترة القادمه بمثل هذة الحنكة فى الأخراج وبمثل هذا الأنتاج

بشهوته دمر أقتصاد بلده

2008-09-12T14:08:00.002+02:00

بشهوته دمر أقتصاد بلده

المتهم برئ حتى تثبت أدانته كلام كلنا عارفينه ومقتنعين بيه بس برده لما الواحد يفكر شويه بس أنا أيه اللى يخلينى أدخل فى حاجه ممكن تضرنى أو تهز صورتى أو مكانتى؟؟؟ ليه وعلشان أيه

أبويا قبل كده قالى كلمة بس أنا مقتنعتش بيها للأسغ غير متأخر شويه قالى فى بلدنا دى كل واحد ملوش دعوة بالحاجات اللى متخصوش يعنى بلغتنا كده (ملناش فى اللى ملناش فيه)

نيجى بقى لصاحبنا هشام طلعت مصطفى أيا كان مذنب أو برئ دى حاجه متخصنيش شخصيا بس الواحد بيستفيد من المواقف اللى زى دى فى حياته فالحياة ما هى الا مدرسة كبيرة عم هشام زى ما أنتوا عارفين مساهم قوى فى الأقتصاد المصرى بشركاته العديدة ومجموعته الأستثماريه العملاقه

يعنى أى دروب يحصل له أو أى حاجه تتعلق بيه من غير كلام هتأثر على أقتصاد البلد ويتهز أكتر ما هو مهزوز يعنى من المفروض أن يكون بعيدا كل البعد عن أى مصدر من مصادر الشبهات أو الشائعات

لكن من زمان وأحنا عمالين نسمع مقترن بالمطربه سوزان تميم مع أنها زى كتير من الفنانات مشاكلها كتير جواز وطلاق ومشاكل وقضايا طب عليك بأيه ياأبن الناس؟؟؟؟

فى رأيي المتواضع طالما أخذت الحكومة هذة الخطوة بأحضار هشام فهى شبه متأكده من أنه مذنب (ده واحد من التقال اللى فى البلد مش أى حد يعنى) فهذا الضلع من أضلاع الأقتصاد القومى قارب على الأنكسار ولهم الله من يستثمروا بأسهم فى مجموعته بالبورصة اللى لما كان الأمن مستتب وكل حاجه تمام بيشتكوا من ضعف قيمة السهم فتخيلوا دلوقتى هيعملوا أيه؟؟؟؟

الشيطان زين ليه الأنتقام والحاجات اللى أحنا عارفينها دى كل ده من أجل شهوه مفيش حد ينكر أنه كان فيه علاقة تربط هشام بسوزان ولكن بأى حال من الأحوال هل تدفع علاقة مهما كانت نهايتها الى القتل وبالذات لو كان القاتل أو المتسبب فى القتل أحد قيادى الحزب الوطنى وعضو مجلس شورى وأحد أهم المستثمرين فى البلد؟؟؟

ده اللى أحنا هنعرفه قريب بس زى ما قولتلكوا مجرد أن الواحد يدخل نفسه أو يخلى أسمه رايح جاى فى منطقة شبهات (ده لو كان برئ) هى دى المشكلة الكبيرة

مش كل حاجه البلد

2008-09-10T11:38:00.007+02:00

مش كل حاجه البلد

لما تلاقى واحد بيسرق من شركته أو الحته اللى بيشتغل فيها نجيب اللوم على البلد ونقول ما هى حكومتنا مهيأتلوش الجو المناسب والعائد المناسب ولما تلاقى واحد بيتسول فى الشارع نقول حكومتنا مجبتلوش مكان يعيش فيه وشغل يكسب منه ولما واحد ينصب عليك نقول البلد مفيهاش قانون رادع ولما ولما ولما

قليل أوى لما أسمع واحد بيطلع ويقول أن المسئوليه فى اللى أحنا فيه دلوقتى بيشارك فيها الشعب زى ما بتشارك فيها الحكومه أنا على فكره عمرى ما كنت فى الحزب الوطنى ولا هكون فيه بل أنه أتعرض عليا أكتر من مره بس أنا رفضت بس الموضوع أن أنا زهقت من كتر ما بنرمى اللوم على البلد ومبنصلحش من نفسنا

تقريبا بنستسهل بدل ما كل واحد يدور فى نفسه على عيوبه ومشاكله ويحاول يصلحها بنستسهل ونقول البلد وبقت لبانه وحجة كل أنسان فاشل مش عارف يشوف نفسه فى حاجه

يعنى أيه دخل البلد فى واحد بيسب الدين لجاره وبعدها بيومين تلاقيه بيصلى فى الجامع وأيه دخل البلد مع واحد مش عارف حدوده فين فبيتطاول على اللى أكبر منه سواء فى الشغل أو الشارع

أنا مبقولش أن بلدنا دى بريطانيا ففيها مشاكل وسرقه لو أتكلمنا عليها هنتكلم للسنة الجايه و أقرب حاجه من السرقه موضوع أسعار العربيات ودى عايزه بوست لوحده علشان نتكلم عليها بس لو فضلنا نرمى كل حاجه على البلد ولا هنصلح من نفسنا ولا هى هتتصلح علشان بينى وبينكوا المسئوليين أتعودوا على أن كل حاجه بتترمى على البلد

والله ياناس لما بقعد مع نفسى كده فى ساعة صفا دماغى بتبقى هتشت من اليابانيين فاللى عملوه ده كان معجزه بكل المقاييس فبعد لما الباحثين العرب أسقطوا اليابان من حساباتهم بعد هزيمتها فى الحرب العالميه التانيه وشالوها من على الخريطه بعد الضربة النوويه المعروفه بس بأرادة شعب (أصلى ما كنش فيه دولة ساعتها أصلا) بشعبهم بقينا أحنا دلوقتى اللى نفسنا يحطونا فى حساباتهم

ولا الصين حدث ولا حرج كفايه أن اللى ميعرفش الصين عرفها من الأولمبياد التاريخى اللى عملته وكمان أكيد كل واحد من الشعب دلوقتى عارف الصين كويس أوى لأن ببساطه كل بيته بقى صنع فى الصين أى حاجه أنا أندهشت من كام يوم جالى زجاجة (بارفين) هدية فبشوف دى فرنسيه ولا أيطاليه ولا أيه فلقيتها صينيه

والله ياجماعه لو عايزين نبتدى فى طريق المليون ميل (مش الألف ميل) لازم كل واحد يبدأ بنفسه فى تعاملاته فى تصرفاته فى أخلاقه ونبطل تعليق كل حاجه على شماعة البلد ساعتها ممكن يكون فى أمل
كل سنة وأنتوا طيبين

كل سنة وأنتوا بخير

2008-09-08T11:47:00.006+02:00

السلام عليكم

أزيكوا حبايب قلبى وحشتونى ووحشتنى المدونة وكل سنة وأنتوا طيبين معلش الفترة اللى فاتت كنت مشغول قوى بتدريبات وبعد كده رمضان دخل فأعذرونى لعدم تواجدى الفترة اللى فاتت بس أنا بحضرلكوا فى بوست تقيل ولغاية ما يجهز دى شوية صور من التدريبات اللى كنت فيها

ودى كانت صور من أول تدريب كان فى شركة سوميد لو تسمعوا عنها

ودى صور التدريب التانى وكان فى شركة بتروبيل أستنوا بقى البوست جاى فى السكة

عظيمه يا مصر

2008-08-01T19:58:00.001+03:00

عظيمه يا مصر

عظيمه يا مصر ياأرض الرشاوى ياأرض الوسايط ياأرض الرغاوى

الرغاوى دى قصدى بيها الرغى يعنى الكلام الكتير بس القافيه حكمت هى دى الكلمات اللى مفروض نوصف بيها مصر دلوقتى

كل ما حالنا مش هقول يتعدل بس مجرد ما يثبت تطلعلنا حاجة جديده تخرب الدنيا أكتر ما هى خربانه وجه الدور على قانون المرور الجديد اللى فى رأيى أنه أتعمل علشان يعلى دخل عساكر المرور فبدل مبتظرف عسكرى المرور بريزه دلوقتى هيبقوا بريزتين بس كده هو ده فى رأيى سبب صدور قانون المرور الجديد

فالقانون ده بجد أنا حاسس اللى عمله كان قاعد مع المدام بيحكوا وفى وسط كل حكاية كان بيكتبله مادة ولا حاجة فبالعقل لما تكون المخالفة لمن لا يرتدى حزام الأمان وغالبا بيكون ده سهوا مخالفته هى الدفع والحبس ولكن لما الواحد يمشى مخالف فى شارع رئيسى وده أكيد بيبقى قصده لأن أى كائن حى عارف أنه لازم يمشى يمين الطريق ده بخلاف القطارات فمخالفة ده ايه ياولاد؟؟؟ أيوه الدفع بس يعنى أمشى معاكس وممكن أخبط حد وأدفع 100 جنية يابلاش

فده يدل على أن اللى عمل القانون كان قاعد مع المدام وأنا كمان حسب ما قريت القانون مشفتش مادة بتتكلم على الرادار والسرعات وكده ليه؟؟ لأن الرادار فى بلدنا سبحان الله غير أى بلد بيجيب العربية من قدام الأول بيشوف على أزازها نسر ولا ميزان ولا لأ لو ملقاش ينزل عالنمرة على طول طالما طلبت معاهم يلموا شوية فلوس يجيب النمرة ويكتب أى سرعة خياليه وعديها ومحدش هيقدر يتكلم علشان الغلابه بس اللى بيلقطهم الرادار

وياسلام لما نيجى لشنطة الأسعافات فيلم والله ومفروض أن أحنا نصدقه يعنى قال شوية أدوية ومراهم وشاش هيظبطوا الحياة ولما حد يتكلم يقولوا فى أوروبا والدول المتقدمه الموضوع ده من زمان جاتكوا ستين نيله أوروبا أيه وأمريكا أيه ولا واجبات الأفراد بنقتدى بيها بأوروبا ولكن واجب الحكومة مش مهم

كنت قاعد مع واحد من كام يوم وبنتكلم فى الموضوع ده فقالى تعرف ايه اللى مخلى الغرب يحترموا قوانين المرور يعنى وأنت ماشى لوحدك بليل مفيش حد غيرك تقف وتحترم الأشارة فقولتله أيه يابشمهندس؟؟ قالى السيستم يعنى نو وسايط ونو رشاوى ونسور وموازين فوضحلى وقال الكاميرا الديجيتال اللى فى كل أشارة هتجيبك هتجيبك وأدالى مثال بأن الغرامة فى لندن للى بيعدى على القضبان فى محطات القطارات ألف جنية أسترلينى بمجرد ما هتعدى هتتجاب عن طريق الكاميرات فى ثوانى فده الفرق بينا وبين الغرب ياسادة عقوبات رادعه و عالكل

نيجى للجزء التانى من الجملة الوسايط ومعتقدش أننا محتاجين نعرف البلد ماشيه أزاى فكله عارف المصالح والشركات الحكوميه التعيينات فيها ماشيه أزاى ده حتى الشركات الأستثمارى زى سوميد محافظ السويس عين أبنه فيها فالجزء ده مش محتاج كلام كتير

أه من الجزء الأخير الرغى اللى مودينا كلنا فى داهية فمفيش حد مبيتكلمش عالناس وشوف ده عامل ايه وشوف دى لابسه أزاى ومحمد عمل كذا وكذا وده أبن كذا و ماجى مصاحبه مين و فكت منه فتقريبا أحنا مضيعين أكتر من نص وقتنا فى كلام عالناس ولا بيفدنا بأى حاجه بل أنه هو ده اللى هيشدنا عالنار

وعظيمه يامصر

بناءا على طلب الجماهير

2008-07-30T17:52:00.003+03:00

بناءا على طلب الجماهير

بقالى فترة عمال يتبعتلى فى تيجان خلاص لدرجة أن الدرج بتاع مكتبى مبيقفلش من كتر التيجان فقررت أنى أدمج كل التيجان فى تاج واحد كبير وحبايبى اللى بعتولى تيجانى كتير هقول على بعض منهم بس الباقى ياريت ميزعلش اللى فاكرهم دلوقتى سارة البحر وميادة بس فى غيرهم وأول ما أفتكر هضيف أسمائهم

نيجى للجد بقى

أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟

أول وردة لحبيبة قلبى
تانى وردة لجنات
تالت وردة لكل واحد ربنا كرمه بالمال والشهرة وكل حاجة وكل ما ربنا يكرمه يزيد تواضع

لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟

مفيش حياة من غير حب فلو محبناش أهلنا ولو محبناش أصحابنا ولو ملقيناش حبيبتنا أو حبيبنا تخيلوا الحياة هتبقى عامله أزاى

ما هو هدفك فى الحياة؟؟

أنى مبقاش عادى أهو عايشين وخلوها على الله فأنا أن شاء الله السنة الجايه هتخرج من هندسة بترول ولكن عمرى ما وقفت بتصورى أن أنا أبقى مجرد مهندس بترول بس ولكن حلمى أن يبقى ليا بيزنس خاص بيا بالأضافة للعمل فى مجال البترول

أذكر أحلام تخص ماضيك..كنت هتتخلى عن ايه و هتتمسك بايه لحد دلوقتى؟

كان حلمى أدخل كلية صيدلة وكمان كان حلمى أنى أكمل فى لعب الكرة الطائرة وأبقى لاعب كبير الحلم الأول ممكن هو دة اللى أتخلى عنه بما أنى فاضلت وأخترت هندسة لكن الحلم التانى نفسى الأيام ترجع بيا علشان أقدر أحققه

أذكر أحلام تخص مستقبلك و ما تتمناه؟

أتمنى أن ربنا يكرمنى وألاقى شغل مناسب وأبدأ حياتى وبعد كدة أكون أن شاء الله أسرة لذيذة كدة

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟

اة لأن المقولة دى بتدى أمل للأنسان بطريقة مش عادية فمش مشكلة أنك تقع النهاردة عادى بكرة هتقف تانى وهتكمل

من المغنى اللى بتحب تسمعه أوى؟؟؟

من الرجال أكيد فضل شاكر
ومن البنات طبعا على رأسهم جنات وبعد كدة شيرين وأليسا

و إيه أحلى أغنية بتحبها ؟؟

بما أنى قلت فضل فهتبقى ياحياة الروح وحظك ياقلبى ومعقول وغيرها كتير

وكل أغانى جنات بس أكترهم بحبك وجديد

غزه..تمثللك ايه فى حياتك..؟

بشبها بالمرأة اللى سابها جوزها وولادها لوحدها فتم أغتصابها من كل شخص يمر بجانبها

إعطى لانتمائك لوطنك درجه من مائه

السؤال دة لو أتسألته وحد طلب منى أنى أجاوب بسرعة هقول لأ معنديش أنتماء ولكن هديلكوا مثال بسيط أوى بتبقى عامل ايه لما مصر بتلعب فى بطولة ولا حتى ماتش ودى جاوب عالسؤال دة وهتعرف أنت منتمى لمصر ولا لأ

بس الأكيد أن أحنا لا ننتمى للنظام فى مصر

عمرك غشيت فى امتحان وانت صغير..؟

الأجابة كوميديه شوية لا عمرى ما غشيت وأتا صغير بس أول ما رحت الجامعة أقل حاجة نص الأمتحان بيبقى من اللى حوليا والنص التانى اللى ربنا يكرم الواحد فيه

أذكر بعض الصفات التى تصف شخصيتك؟؟

والله الواحد صعب أنه يوصف نفسه بس أهم صفاتى أنى عصبى لما أتعصب مبشفش مين قدامى و راجل أوى مع الراجل معايا وبس

صفه عاوزاها فى شريك حياتك

أنها تكون بتحبنى أوى علشان تقدر تفهمنى أوى

إيه اللى غير دراستك وشايف نفسك فيه قوي ؟

الصيدلة ونفسى يكون عندى فى يوم من الأيام أكتر من صيدلية وكمان شايف نفسى فى المقاولات البتروليه ونفسى فى يوم يكون عندى مكتب عالمى فى المجال ده

بس كده أعذرونى لو كانت أجاباتى قصيرة بس بجد لأنى مبعرفش أتكلم عن نفسى كتير

قال ملتزمه قال

2008-07-18T11:46:00.002+03:00

قال ملتزمه قال

أنتشر أوى من فترة موضوع الأسدال اللى لما رحت السعودية من 10 سنين لقيت كل الأيرانيات لبسينه فأحنا زى أى حاجة حلوة أو وحشة بنجيبها من برة مبنقولش لأ ودلوقتى أحنا فى طريقنا أن النقاب هيبقى سايد زى الأسدال بالظبط

المشكلة فين بقى؟؟؟ المشكلة أن اللى نلبسه مفروض يبين الى حد ما شخصيتنا فأنا مثلا بلبس تشيرتات وجينز ومش مربى دقنى فخلاص تقدر تقوا أن أنا عادى ولا متدين أوى ولا فاضى أوى دة الأنطباع الأول لكن لما تتكلم معايا هتفهم دماغى ماشيه أزاى فاللبس لوحده مش هيدى أنطباع كامل

فالمفترض كمان أن البنت اللى لابسه أسدال أنها تكون فاهمه هى لابسه ايه مش لابساه وخلاص يعنى أنا يفترض لما أشوف واحده لابسه أسدال يبقى الى حد ما متدينه عارفه ربنا مش مصاحبه

لكن بما أننا بلد التناقضات فالعادى أنك ممكن تشوف واحده لابسه أسدال بتتحضن وهكتفى بالحضن علشان مغوطش وكمان أبتدى يبقى عادى أنك تلاقى بنات منقبه بتهرج مع شباب فى نص الشارع مش مشكلة هنفترض أنه أخوها لكن تضحك ضحكة لا مؤاخذة متضحكهاش غير رقاصه لا فولستوب هنا

فى بنات بتتجه لموضوع الألتزام فى اللبس من أسدال و نقاب لأنها مبتعرفش تعيش حياتها فى الجامعة أو بعدها فبتقول أخدها من اصلها وألتزم علشان تبقى دى حجتى لو واحده صاحبتى قالتلى أنتى مش مرتبطه ليه أو مش مصاحبه ليه؟؟؟؟ لكن منقدرش ننكر أن فى بنات كتير دول فعلا ربنا يكرمهم صاينين نفسهم وصاينين عيون الشباب وملتزمات على حق ربنا

أنا فكرت أخد رأى الناس فى موضوع الألتزام فى اللبس بس لكن طبعا التصرفات والأخلاق حدث ولا حرج خصوصا أن أحنا الفترة الجاية هنلاقى زيادة كبيرة فى أعداد المنقبات وكمان عدد اللى بيقلعوا بيزيد

سبحان الله كل حاجة فى البلد دى بتزيد ألا مستوى دخل الفرد

والله ما تستاهل

2008-07-11T12:14:00.006+03:00

والله ما تستاهل

مرت سنة لم تمر مصرنا الحبيبة بها ولا أعتقد أنها ستمر بمثيلتها فى المستقبل القريب وهى السنة الكارثية فى تاريخ الثانوية العامة فكل شئ ممكن أن يتخيله الأنسان فى أمتحان مر به طلاب الثانوية هذا العام من صعوبة وطول الأمتحانات بالأضافة الى أسئلة تخيلية لم تستطيع واضعه الأمتحانات أن تجد بعض الأجابات لبعض الأسئلة لكى تضعها فى الأجابة النموذجية

وكانت ظاهرة من ظواهر الأمتحانات هذا العام التسريب الذى حدث فى محافظة المنيا لبعض الأمتحانات بأجوبتها النموذجية فكان هذا مصدر للشرارة التى أشعلت النار فى كل ما حولها فقد ظهر خلل واضح فى المنظومة ككل من واضعى الأمتحانات وعدم ألتزامهم بما قال الوزير وخلل فى المناطق التعليمية ورؤسائها والمسئولين عن توزيع الأمتحانات فى هذة المناطق التعليمية

لا والأدهى والأمر أن يحرم طالب من أداء جميع الأمتحانات لمجرد أنه أراد أن يعبر عن رأيه ليس بالصوت وأنما بالقلم وأراد أن يكتب ما يحدث له داخل اللجنة من ظلم بين لأنه ملوش ظهر يستند عليه أتحرم من الأمتحانات وضاعت سنة من عمره

http://www.youtube.com/watch?v=fxCC5tQMqng

وكان كمان جديد السنة دى أن أسئلة فى أمتحان الثانوية العامة تبقى ناقصة معطيات فكان الحمد لله السنة دى كل حاجة غير والواحد أو الواحده اللى عنده أو عندها غلطتين بتحمد ربنا أوى بعد ما كان الواحد على أيامنا بيقفل الأمتحان وبعد كدة يدعى ربنا أنهم ما يتلككوش فى التصحيح فالسنة دى كانت كل حاجة غير

الموضوع باين من عنوانه نصعب الأمتحانات علشان نقلل المجاميع ونثبت مجموع القبول فى طب وهندسة علشان نوسع المجال للتعليم الموازى الى بفلوس طب ياجماعة ما نقصر ونخلى التعليم بفلوس من دلوقتى الشعب بيفهم والله مش هنود فبلاش اللف والدوران نفسى مسئول محترم يطلع ويقول التعليم الجامعى هيبقى بفلوس بعد كذا سنة

الناس مش ناقصة فوضعنا الأقتصادى ضايع وكمان وضعنا السياسى وكل حاجة فى البلد الحمد لله بترجع لورا كل اللى بيتمناه الأنسان المصرى أنه يشوف أبنه أو بنته فى كلية نضيفه لكن حتى هذا الحلم أصبح صعب المنال وأصبحت الأمتحانات هذا العام مصدر نكد وكأبة فى البيت المصرى

http://www.youtube.com/watch?v=cK0EEK4kZuY

والطلبة والطالبات اللى بينتحروا بعد كل أمتحان على أساس الضغوط اللى بيتعرضوا ليها فى كل حتة أولا فى لجنة الأمتحانات ثانيا فى البيت وأنه مطالب أنه يجيب مجموع عالى وألا .......... أنتوا عارفين فالطالب أو الطالبة يلاقوا نفسهم مأدوش فى الأمتحانات فيقصروا وينطوا من أى حتة أو يبلبعوا أى حاجة يريحوا نفسهم ويريحوا اللى حوليهم

ومعرفش الكلام دة على أساس ايه؟؟؟ على أساس أنهم لما يدخلوا كلية من الكليات اللى بيتقال عليها قمة ويخلصوا هيلاقوا شغل على طول والحياة هتبقى وردى الموضوع عايز توعية أولياء الأمور قبل الطلبة أن مبقاش فى كليات قمة وقاع فمثلا كلية طب اللى بيتخرج منها بعد العمر الكبير فى الكلية أخره 250 جنية ويوم ما يشتغل فى مستشفى خاص أخره نقول 700 يعنى شوف اللى عمله فى عمره كله بياخد كام بعديه

وممكن واحد خريج مش هقول تجارة لو معهد يفهم الدنيا ماشية أزاى ويعرف يجيب الفلوس أزاى ويبقى أحسن من 100 مهندس أو دكتور على بعض فالموضوع مش موضوع شهادة بس المشكلة أن أبنى أو بنتى لازم يجيبوا مجموع علشان الواجهة الأجتماعية بس كلوا بيتساوى فى الأخر اللى بيفرق الأنسان اللى بيشغل دماغه ويعرف الحياة ماشية أزاى

أتفقنا أو أختلفنا فنظامنا التعليمى فاشل بكل المقاييس ولكن ما العمل لو الواحد مستريح ماليا يدخل ولاده مدارس أجنبى وكليات أجنبية ولكن لو مستواه متوسط يبقى ملناش غير الحكومى وخلوها على الله

حتى اليهود صعبوا علينا

2008-07-03T13:47:00.003+03:00

حتى اليهود صعبوا علينا

للسينما سحر خصوصا اذا كنا نتحدث عن السينما الأمريكية فبفيلم لا تزيد مدته عن ساعتين ننتقل الى قلب الحدث وقلب الزمان والمكان سواء كان ماضيا أو حاضرا أو مستقبلا فالسينما أصبحت أحدى المصادر الرئيسية لثقافة الأفراد والمجتمعات وعن طريقها يستطيع من يريد أن يوصل فكرة ما للمشاهد أيصالها بمنتهى السهوله والأقناع وذلك عن طريق بعض الحبك الفنية

فى الفترة الأخيرة شاهدت أكثر من فيلم بعضهم أمريكى والأخر من بعض الدول الأخرى لكنهم جميعا أشتركوا فى كونهم ناطقين بالألمانيه وأبطالهم أغلبيتهم يهود أمريكان وكان الخط العريض التى تسير عليه تلك الأفلام هو ما حدث لليهود فى عهد هتلر فكل فيلم من هذة الأفلام كان يتناول موضوع معين وبحبكة مخرج محترف وأمكانيات بشريه وماديه يضعك فى قلب الحدث وقلب المكان والزمان حتى أنك فى بعض الأحيان تتعاطف مع ما تشاهده أمامك من ظلم لليهود

بعض من هذة الأفلام

The Pianist
Schindler's List
Zwartboek
Katyn
Hitler: The Rise of Evil
Der Untergang - Upade

لا أعتقد أنه يوجد أختلاف كبير بين ما كان يحدث لليهود من الألمان وما يحدث للفلسطينين من اليهود حاليا وذلك على الصعيد الدموى والغير أدمى

لكن الأختلاف يكمن فى أن اليهود حتى وأن لم يزوروا أسرائيل فهم أصحاب قضية يدافعوا عنها وهى أظهار مدى المعاناة التى تعرض لها اليهود فى بولندا وهولندا وباقى الدول الأوروبية وذلك فى عهد هتلر ولكن الممثلين و المخرجين العرب كل ما يشغل بالهم هو الوصول الى هوليود وبمجرد الوصول اليها وتمثيل و أخراج فيلم أو أثنين يشعر أنه أنسان غير عادى ويلقب فى بلده بالعالمى ولكن أن يحاولوا أن يعبروا عن بلادنا وعن أحوالنا فهذا أقرب أن يكون الى الخيال

بأستثناء المخرج السورى العملاق مصطفى العقاد الذى حاول فى هذا الموضوع لكنه بالطبع كان مقيد بالمواضيع التى يناقشها وذلك لأن التمويل يكون بعشرات الملايين من الدولارات ولا بد أن يكون المنتج أمريكى فحاول محاوله رائعة فى أسد الصحراء التى تروى قصة عمر المختار المقاوم الليبى التاريخى ولكن غير ذلك لا شئ يذكر

فى أحدى الحوارات التى سمعتها حديثا لعمر الشريف وردا على الأتهامات التى كانت توجه له عن تمثله مع الممثله اليهوديه صوفيا لورين أثناء حرب 67 فرد وقال بالحرف الواحد أنا لما ست تعجبنى ببوسها وميهمنيش ولا دينها ولا أى حاجة رد يستفز كل أنسان عربى وأكمل حواره بأنه لم يتزوج بعد زوجته الأولى اللى رماها علشان يروح هوليود وقال أنه بيكتفى بليلتين مع أى واحده بتعجبه وهو عارف أن فى خمس صلوات بس بيجيب كل فتره على قد ما يقدر

هذا الكائن البالغ من العمر 76 عام وفقه الله بالتمثيل فى أرض الأحلام لكن ماذا ترك عندنا كمشاهدين؟؟؟؟؟ الجواب عندكم

هذا هو الفارق بين الغرب الذى يؤمن بقضية يدافع عنها بكل ما يملك وبيننا نحن

كفايانا سلبية 2

2008-06-28T14:32:00.005+03:00

كفايانا سلبية 2

أتفتح موضوع مع ناس زمايلى عن البنات والمعاكسات وكدة حاكم أنا كان ليا قصة مع عيال فى ثانوى كانوا بيعاكسوا بنات ويرموا عليهم طوب وغيره فلقيت بنت منهم جاية تزعق وتهزأ فأنا بينى وبينكم أخدتنى الجلالة ودخلت فيهم مشيت البنت وفى الأول كلمتهم عادى لو أختك والكلام دة لقيت الكلام مش جايب نتيجة وواد قل أدبه محستش بنفسى غير وأيدى فى وشه والناس جت تبعدنى والموضوع وسع

بس بعد كدة لمت نفسى كتير لأنى حسيت أنى قللت من نفسى مع عيال ولا تستاهل وفكرت أنى أسأل ناس زمايلى لو أتحطوا فى موقفى هيعملوا ايه؟؟؟ والاجابات بالنسبة ليا كانت شوية غريبة واحد يقول ولا أكنى شايف والتانى يقول أكيد هعاكس معاهم أستغربت أوى هو أنا اللى مش طبيعى ولا الناس كلها بقت مش طبيعية فخدت قرار أنه لو حصل أى حاجة قدامى ولا أكنى شايف وعادى

بس بجد أتكسفت من نفسى أوى بعد كدة على أساس أن أنا غيرت دماغى على أساس كلام قالوه ناس فقلت لا أنا زى ما أنا بس أكيد الموضوع هيبقى ليه حدود يعنى فى بنات بتمشى علشان تتعاكس دى لا مؤاخذة تتحرق لكن فى بنات بتتعرض لمضايقات رغما عنها

أنا عايز أوصل لفكرة السلبية اللى بقت تسيطر على حياتنا فى كل جملة بنقولها فى كل حاجة بنعملها أو حتى مبنعملهاش فشوفتوا الردود ده حتى الأجانب فى الأفلام اللى بنشوفها مع أنهم متحررين لكن مشفتش قبل كدة أن فى ولد شايف بنت بيتحرش حد بيها وسبها ومشى مش كدة ولا أيه؟؟؟؟

السلبية فى كل مكان فى كل زمان بس زيادة حبتين فى بلدنا دة أنا من يومين بتفرج على ماتش فى نادى شاشة عرض كبيرة وكدة والصورة قطعت صدقونى لمدة ربع ساعة وأنا مستنى أشوف ردة فعل الناس حاجة زى 150 واحد بيتفرج عالماتش أنا ممكن أقوم وأجيب أى حد يظبطها ونخلص بس مستنى أشوف الناس هتعمل ايه؟؟؟؟ ربع ساعة ومفيش حد بيتلفت حتى جنبه لغاية لما أنا قمت وغير كدة كتير فى كل مكان حتى الميكروباص لما يحصل مشكلة بين زبون والسواق ويكون الزبون على حق ولا أكن حاجة حصلت والحياة عادية خالص حتى لو السواق قتل الزبون ولا حد هيكلمه

تقريبا بقت السلبية شعارنا فى حياتنا فدى دعوة للتحرر من السلبية

لازم يبقى خبرة

2008-06-25T16:27:00.003+03:00

لازم يبقى خبرة

من فترة كنت بسمع برنامج وأستغربت أوى من أراء البنات اللى كانت فيه فمعظم البنات أتفقوا على أنه لازم يكون المرتبط بيها عرف بنت على الأقل قبلها ويفضل أنه يكون عرف أكتر من واحدة الصراحة أستغربت لفترة من الرد دة لغاية ما واحدة جت قالت أنه لو عرف أكتر من واحدة قبلها ودلوقتى هو معاها فدة معناه حاجة واحدة أنها أجمد منهم كلهم علشان كدة سابهم كلهم ودلوقتى بقى معاها غريب والله غريب

كلام ما أقنعنيش وماعتقدش أنه هيقنع أى بنت واثقة من نفسها ومن جمال شخصيتها فهذا النوع من الجمال أهم بكثير من جمال الوجة أو الجسد ولا أعتقد أن الكلام دة هيقنع أى شاب فلو ولد عرف أن البنت اللى مرتبط بيها بتفكر كدة أعتقد أنه هيسيبها فورى فلو الواحدة بدأت بتفكير زى دة تخيلوا ممكن تعمل أيه بعد كدة؟؟؟؟؟؟

وعلى العكس تماما سمعت فى برنامج اخر الشباب بقى بيتكلموا فى نفس الموضوع ومسمعتش ولد واحد بيقول أنه على أستعداد أنه يرتبط ببنت كانت على علاقة بيه بل أن الردود أختلفت من ناحية الصرامة والشدة فى هذا الموضوع فسمعت واحد بيقول دة حتى لو خطبت البنت دى وكانت هايلة وبعد كدة عرفت أنها كانت تعرف ولد قبلى فهسيبها شوفوا الرد قال تعرف مش مصاحبه

فليه البنات اللى قالت كدة تقلل من نفسها وتدعى ربنا ليل نهار أنه يكرمها بواحد كان عارف قبلها دستة بنات؟؟؟؟؟ طب ليه متكونيش أنتى الأولى اللى تحسسيه بكل المعانى الجميلة اللى فى أول حب

حاجة غريبة مش كدة مستنى تعليقاتكوا

للناس فيما تفكر مذاهب

2008-06-21T13:33:00.003+03:00

للناس فيما تفكر مذاهب

كما يقولون للناس فيما تعشق مذاهب فأيضا للناس فيما تفكر مذاهب فلكل منا أفكاره الخاصة به التى لا يمكن أن تتغير بسهولة فالأنسان يشعر بالأنتماء الى أفكاره كما يشعر بالأنتماء لوطنه ولناديه

فمن فترة عرضت موضوع على أصدقائى وأردت أن أعرف ما هى وجهة نظرهم فيه وكان سؤالى هو لو أتعرض عليك شغلانتين واحدة فى الحكومة وهتتثبت فيها وواحدة فى القطاع الخاص أو الاستثمارى بس بعقد فياترى هتقبل بأى واحدة ولية؟؟؟؟

وطبعا الطبيعى أن كل واحد كان له رأى لكن أكيد الجواب الغالب كان أكيد القطاع الخاص علشان فلوسه نبنى نفسنا الأول وبعدين ربنا يكرم بس المشكلة أن اللى بيمسك فى أيده فلوس صعب أوى أنه يسبها أو يتنازل عنها بسهولة لغاية ما ييجى اليوم ويقولوا خلاص شطبنا ياحبيبى

الموضوع دة يودينا لفكرة لية شركات القطاع الخاص المحترمة متحترمش العامل او المهندس أو أيا كان زى ما هو قعد يديها طول عمره وقبل ما تقوله شطبنا تديله فكره قبلها بفترة ؟؟؟؟ ما هو بردة الراجل قعد طول عمره يدى للشركة دى

وكمان دة يودينا لحتة تانية طب لية ميتعملش صندوق خاص بشركات القطاع الخاص دى كل شركة يبقى ليها مندوب فى الصندوق دة وظيفته أنة ياخد نسبة ولو قليلة من المرتب الشهرى لكل موظف على الأقل لو الشركة شطبت بدرى بدرى الراجل يلاقى حاجة لغاية ما يلاقى قهوة قصدى شركة تانية

والكلام اللى أحنا بنسمعه دلوقتى عن تفنيش المصريين فى البلاد العربية لازم يخلينا نفكر فى دة حتى للى بيشتغلوا برة فكل بلد يبقى فيها مندوب للصندوق دة والله اللى عايز يحط يتفضل واللى مش عايز يشرب على راحته وأكيد هيبقى للموضوع قيود فأنت مش هتحط فلوسك فى جمعية علشان تقبضها بعدين لا الفلوس دى بتشتغل وأحنا الحمد لله أحسن ناس تستثمر الفلوس

فى ياجماعة ناس بتبقى متعودة على مستوى معيشة معين ولما ترجع من برة مبتبقاش قادرة تعيش فى الظروف والجو دة فبتقترض وتستلف وبعد ما كان هو البطة اللى بتبيض ذهب بقى كتكوت مستنى حسنة من أى حد والكلام دة حاصل قدامى كتير

مش كل الناس بتفكر فى بكرة ولا كل الناس بتفكر فى أنها تعمل حساب المستقبل فمفيش مشكلة أن أحنا نفكرهم وهما هيستفيدوا وكمان الصندوق اللى هو أكيد تبع الدولة والحمد لله الفلوس فى بلادنا بتزيد مش بتقل

سوق عربية

2008-06-18T14:42:00.005+03:00

سوق عربية مشتركة

...........................سوق عربية مشتركة
كلمة قالوها زمان..................................

............................ماكنتش كلمة مفتعلة

بس مشكلتها المكان..............................

..........................وبعد ما قدمت أقتراحى

لأخوانا اللى ضميرهم صاحى..................

.........................كان والله قصدى شريف

وجبتلهم مكان حريف............................

.................قالولى أيه دة اللى أنت كاتبه؟؟

روح أدى دة لصاحبه..........................

.......................قلتلهم أنتوا قصدكوا أية؟؟

قالولى أنت اللى أسمك أيه؟؟...................

...................قلت واحد بيحب وطنا العربى

ومعلش الذنب دة ذنبى.........................

............................بس ليا عندكوا طلب

قالوا أتفضل أطلب بأدب......................

......................ممكن بعد كدة مشروعاتكم

أو يعنى حتى بيانتكم............................

تنزلوا معاها تفسير

...........................حاكم أنا فهمى ضعيف

وماليش فى الدنيا غير الرغيف...................

......................بسعى وراة ويسعى ورايا

ودة أخر طلب معايا.............................

فاكرين ياجماعة فكرة السوق العربية المشتركة دى اللى فاكر يبقى يدينى مسد

FORZA ITALIA

2008-06-08T11:32:00.012+03:00

سأخصص هذا البوست للحديث عن أيطاليا الساحرة جنة الله فى الارض وذلك بمناسبة بدأ منافسات يورو 2008 وبالطبع كل المصريين بيشجعوا المنتخب الأيطالى وكمان غير المصرين

هندافع هندافع وأنتوا مالكوا ............خلوا الهجوم ينفعكوا

وفى البداية بعض المعلومات عن أيطاليا

السكان..................58 مليون نسمة

الموقع

دولة أوروبية تقع في جنوب القارة الأوروبية. تتكون أيطاليا من ثلاث أجزاء أساسية، الأرض المتصلة بأوروبا، التي عادة ما يتم وصف شكلها بالحذاء، وجزيرتين هما صقلية وسردينيا. يحد إيطاليا من الشمال جبال الألب، ويوجد داخل الأراضي الإيطالية دولتين مستقلتين هما الفاتيكان وسان مارينو

الحضارة

تشكلت الشعوب الرومانية القديمة في القرن الثامن أو التاسع قبل الميلاد، حينما أتت قبائل شمالية إلى عمق شبه الجزيرة الإيطالية لتستقر عند نهر التيبر. لعدة قرون على مر الزمن، كانت روما أهم مدينة في العالم الغربي، عندما كانت عاصمة الإمبراطورية الرومانية. مع ظهور الدعوة المسيحية وانتشارها، أصبحت روما مركزا للدين المسيحي ومقر باباوات الكنيسة الكاثوليكية. في العصور الوسطى وخاصة بعد انحطاط الإمبراطورية الرومانية، دخلت روما عهدا مظلما. سطع نجمها مجددا في عصر النهضة وأصبحت من خلال فناني وأدباء إيطاليا عاصمة سياسية لأوروبا

للعلم

FORZA ITALIA

هو من أشهر الأحزاب الموجود فى أيطاليا وهو حزب ليبرالى

الأقتصاد

تعتبر إيطاليا اليوم أكبر خامس قوة اقتصادية في العالم، وهي أحد الدول الصناعية الثمانية في مجموعة G8 .لدى إيطاليا موارد طبيعية محدودة، فلا توجد احتياطات نفط أو فحم أو حديد؛ لذلك فإن معظم المواد الخام اللازمة للصناعة و 75% من احتياجات الوقود يتم استيرادها من الخارج.أهم الصناعات: السيارات والكيماويات والأدوية والكهربائيات والملابس والأزياء

الدين

كانت روما مركزاً للديانة المسيحية الكاثوليكية حتى عام 1929، إلى أن تم إنشاء دولة الفاتيكان المستقلة في قلب روما في ذلك العام، لكي يتسنى لساسة البلاد فصل الدين عن الدولة فعلياً.وتعتبر دولة الفاتيكان أكبر مركز التنصير الرئيسي الذي تنطلق منه الإرساليات التنصيرية حول العالم

المعالم السياحية

في مدينة بيزا يمكن للسائح مشاهدة برج بيزا المائل والذي يعد من إحدى العجائب نظراً لوضعه المائل الناتج عن انخفاض الأرض تحته وتوقع الكثير انهياره إلا أنه مازال صامداً إلي ا لآن ويفد عليه العديد من السياح لرؤيته

مدينة فينسيا الرائعة، أو مدينة البندقية والتي تسمى "المدينة العائمة" أو " المدينة الغارقة" والتي تشتهر بالجنادل "القوارب"التي تجري في قنواتها والتي تعد وسيلة رائعة للاستجمام والشعور بالجو الرومانسي الذي يقدمه العازفين من خلال المقطوعات الموسيقية الجميلة، فهي مدينة جميلة تقبع في مياه البحر ولا توجد بها وسائل المواصلات المعهودة من قطارات وسيارات فقط مجموعة من الجنادل الأنيقة

ينتمي الكولسيوم الروماني لنوع من المباني التي أقامها الرومان القدماء يطلق عليه (مسرح الامفير) وهو مسرح مستدير مفتوح في الهواء الطلق أي يخلو من الاسقف والاعمدة بغرض عرض مختلف مسابقات وعروض المصارعة والقتال بين البشر او بين البشر والوحوش المفترسة حيث كان الشعب الرومانيمغرماَ بمشاهدة تلك العروض الدامية او لمشاهدة سباق العربات.تم بناء اول مسرح من هذا النوع عام 59 قبل الميلاد وكان من الخشب وفي عهد اوغسطس اول امبراطور لروما تم بناء اول مسرح أمفير يتألف من مواد حجرية وخشبية ثم جاء الكولسيوم الحجري وهو مسرح الامفير الوحيد المتبقي في روما حتى الآن .يعدّ الكولسيوم رمزا لمدينة روما كما يعتبر احد المعالم الاثرية والسياحية المهمة وأحد الروائع الهندسية القديمة وذلك لساحته الكبيرة ومدرجاته الضخمة المقامة بلا أعمدة وديكوراته الفخمة بدأ العمل في بنائه في عهد الامبراطور (فيسبا سيانو) عام 72موانتهى البناء بعد ثماني سنوات حيث افتتحه ابنه الامبراطور (تيتوس) اطلق عليه في بادئ الامر مسرح (فلافيو) ثم تحول الى الكولسيوم التي تعني بالرومانية ((البناء العظيم))يتميز الكولسيوم الذي يعد اول ستاد في التاريخ بمدرجاته العمودية التي كانت تتسع لأكثر من (75) ألف مشاهد من عامة الشعب الروماني وعلية القوم من النبلاء كما يوجد به إيوان أو ركن خاص للأمبراطور وآخر من الرخام الاملس لشيوخ روما .الشكل الخارجي للبناء مصمم على هيئة أقواس وهو مكوّن من أربعة أدوار ثلاثة منها مكوّنة من 80 قوساً أما الدور الرابع فهو جدار أصم بدون أقواس .يبلغ ارتفاع الكولسيوم حوالي 75 متراً طوله 188 متراً وعرضه حوالي 156 متراً كما يوجد له أربعة مداخل رئيسية أحدها كان مخصصاً لدخول الامبراطور وحاشيته والثاني للقضاة والثالث لضيوف الشرف من أمراء وملوك الدول الاخرى أما الرابع فكانلعامة الجمهور

فى الأخر محدش يقرب من الكاس لأنه أيطالى سواء دافعتوا هاجمتوا أنسحبتوا وهنرفعوا زى ما رفعنا كأس العالم و

FORZA ITALIA

خلينا نعيش

2008-05-22T14:04:00.002+03:00

الحياة جنة عيشها واتهنا

كانت فتاة كباقى الفتيات كل حلمها أنها تلقى ابن الحلال وتبدأ حياتها معاه ويعوضها عن كل اللى معرفتش تعمله فى حياتها قبل كدة وفعلا ربنا كرمها وجالها عريس ميسور الحال مرتب كويس شقة معقوله يعنى مش بطال وعلشان انتوا عارفين ظروف البلد وأرتفاع نسبة العنوسة فمحدش يقول لعريس زى دة لأ

مرت الايام والحياة مشيت عاشوا مع بعض ربنا كرمهم بولد وبنت بس الحياة مش خط مستقيم اكيد هيحصل انحراف فى أى جزء منها بدأت هذة الفتاة فى ترك البيت والأقامة شبة الكاملة فى بيت أهلها ولكن كل ما حد يسأل هو فى حاجة ولا أية ؟؟؟ الاجابة لا طبعا هيكون فى اية يعنى دى قالت تغير جو يومين كدة

حتى وصل الحال الى أستحالة أستكمال هذة التمثيلية فقد وصلت الحالة الصحية لهذة الفتاة الى أدنى المستويات وبالتأكيد كله لاحظ فقامت عائلة الفتاة بعقد أجتماع طارئ فيه تم مواجهة أمها حتى تقول لهم الحقيقة وبالفعل كالمتوقع صارحتهم الأم بأن زوج الفتاة تغير تغيرا كبيرا منذ فترة وكان من أقل موقف يقوم يشتم ويضرب فيها لدرجة أن الجيران كانت بتطلع تحجز

حالة الفتاة من سئ الى أسوء مما أستدعى نقلها الى مصر حتى تستكمل علاجها هناك وقد حدث ما لم يتخيله أنسان فقد فارقت روحها جسدها لتصل الى خالقها الذى سيكون باى حال من الأحوال أرحم بها من اى أنسان أخر تاركه خلفها طفليها الصغيرين يتيمين الأب والأم

الأب الذى ظهر فيما بعد أنه مش طبيعى

كل اللى حصل دة بسبب أن أهلها كانوا خايفين من كلام الناس المشكلة الأكبر فى مجتمعنا اللى دايما بتكلم عليها يعنى لو كانت طلبت الأنفصال أو أصرت عليه من بدرى كان دة هيبقى الحال اكيد مش كدة بس طبعا قدر الله وماشاء فعل

من القصة دى قعدت افكر فى البنت دى وفى أزواج وزوجات كتير الراجل أول ما يخش البيت يقعد يلعن ويشتم فى العيال وأمهم وكذلك الأم دا أنا طول اليوم واقفة أنا زهقت وقرفت ياجماعة هى الحياة بنعيشها مرة واحدة مش مرتين فليه نكون مضطرين نعيشها بطريقة مش عايزينها علشان بس يبقى وضعنا الأجتماعى بين الناس كويس ومحدش يقول أى تتعلق بينا أو ببيتنا

عارفين أحسن حاجة فى المجتمع الغربى هى أن كل واحد بيعمل اللى عايز يعمله علشان يبقى مستريح نفسيا وجسمانيا عمرى ما شفت فى فيلم ولا حتى مسلسل أجنبى أن أنسان أضطر يعمل حاجة مش عايزها علشان منظره قدام الناس ياسلام لو نعيش الحياة زى ما أحنا عايزينها بس طبعا من غير ما نغضب ربنا فى أى حاجة يعنى كل واحد أكيد ليه ميول وحاجات بيحبها بس ممكن ميكونش عايز يعملها علشان الناس ممكن تقول عليه مجنون أو أى حاجة من كلام الناس اللى مبيخلصش

يعنى أنا مثلا بعشق الكورة والتنس طبعا أبويا كان بيقول عليا مجنون وساعات كان يقول عليا بتاع كله قصده بتاع جميع الرياضات لكن أنا حاجة بحبها وبستمتع بيها فمبديش ودنى لحد لدرجة أن البيت كله دلوقتى بقى من متابعين التنس ويسألونى عن القوانين واللعيبة

فى سؤال نفسى أسأله لناس كتير ومستنى أجابتكوا عليه وهو
ياترى لو لا قدر الله ربنا رزقك بعريس أو عروسة ومع العشرة عرفت أو عرفتى أنه بتاع أو بتاعه مشاكل ونكدى أو نكدية والحياة بقت مملة وكئيبة هل ساعتها هتنفصلوا ولا هيهمكوا كلام الناس والحاجات دى مع العلم أن أنا أفضل تربية الأبناء فى جو صحى خالى من المشاكل مع أحد الأباء عن تربيتهم فى جو ملئ بالمشاكل مع الأبوين؟؟؟؟ا

كفايانا سلبية

2008-05-15T11:45:00.004+03:00

كفايانا سلبية

اتفرجت على تقرير فى أحدى البرامج التلفزيونية وطرحوا سؤال ونزلوا يجمعوا اجابات للسؤال دة وكان السؤال هو : أنت عندك ثقة فى نفسك يعنى لو أتحطيت تحت ضغط هتقدر تتغلب عالضغط دة وتحل الموقف ؟؟ دة كان السؤال

ونيجى للاجابات كوميديا والله كوميديا واحد يقول مجربتش قبل كدة بس متهيألى عندى ثقة فى نفسى والتانى يقول مش دايما والتالت يقول الناس كلها مهزوزه وواحده تقول مش عارفة بس موجودة وهى بتضحك وواحده تانى تقول اة وبعدها على طول لأ وشوية ناس مش كتير قعدوا يتكلموا كلام مواضيع تعبير بس على مين أحنا جامدين أوى وبنأفش الناس دى

مشكلتنا الكبيرة أن أحنا بنرمى ودننا للناس وبنحدد اللى أحنا هنعمله على أساس كلام الناس مش كلامنا أحنا يعنى ممكن نبقى مقتنعين بحاجة ونعمل عكسها علشان دة العادى

ا((هى جت عليا)) أنا عن نفسى بسمع الجملة دى وبقولها فى اليوم الواحد كتير أوى وبعد ما فكرت فى معناها الواضح والغير واضح أة جت عليا وجت عليك بس أحنا نقتنع بالكلام دة والله ياجماعة لو كل واحد مؤمن بحاجة عملها أو حتى حاول يعملها هيبقى حالنا غير كدة

وهدى مثال على السلبية وانعدام الثقة حتى فى الحكومات موضوع أشتعل فى الفترة الأخيرة موضوع تصدير الغاز للصهاينة وصلت السلبية والخضوع للى أحنا عارفينه واللى مش عارفه يتفرج عالفيديو دة

http://arabtube.tv/videos/Shows/_Amr_Adeeb/Amr_Adeeb__Gas_Deal_with_Israel

ياجماعة جة الوقت اللى أنا و أنت وأنتى ناخد موقف من حاجة كفايانا سلبية وكفايانا نقول هى جت عليا وهو أنا هغير الكون دى ياجماعة بعون الله هتكون نقطة تحول من السلبية اللى احنا كنا عايشين فيها لحتة تانية خلص هنحس بفخر أن أحنا عملناها أو حاولنا نعملها حتى لو ماجبتش نتيجة بس كفاية أن أحنا حاولنا

وهيكون أن شاء الله موقفنا من تصدير الغاز لاسرائيل بالذات بعد ما عرفنا أن الغاز اللى فى مصرواللى فرحانين بيه مش هيكفينا داخليا حتى ولو ل20 سنة

ياجماعة أنا عندى أقترحات كتير بس مستنى أسمع منكم الأول ونحط الفكرة عالتانية ونوصل لأقتراح أن شاء الله يكون فعال كفايانا سلبية ولو بأقتراح منك هتحس أن أحنا عملنا حاجة

دة الواجب بتاعنا ياجماعة بجد محتاج لأقتراحتكوا علشان نوصل لأقتراح يكون فعال ومؤثر

والله الموفق

حاجة تغيظ

2008-04-15T20:41:00.007+02:00

حاجة تغيظ

عايز أفهم هو أحنا ياجماعة مش هنقدر نستغنى عن المنتجات الهولندية ( التافهة ) اللى بجد لا تسمن الشعب المصرى هو أحنا هنتأثر بنوع جبنة ولا شكولاتة واللة أنا بحب أوى ( سنكرس و تويكس) أول ما عرفت أنهم أنتاج هولندى أتضايقت أوى وقررت أنى مجبهمش تانى

ليه نحجم المقاطعة فى 15 يوم بس لية منخلهاش على طول وكل حاجة ليها البديل الجبن الفرنسية و الشكولاتة السويسرية لا يعلى عليها دى طبعا للناس المستريحة والألبان مفيش أكتر منها

واللة ياجماعة فى ناس مش لاقية العيش الحاف وأحنا بنعترض علشان ولادنا أتعودوا يشربوا نوع لبن معين أو ياكلوا شكولاتة معينة دة كلام

ولو عندك عربية مش لازم تروح تمون فى بنزينة شل ولا دة بنزين خصوصى ؟؟؟؟؟ فية 100 ألف بنزينة تانية واللة ياجماعة أحنا أقوى من أن نوع جبنة ولا صابون يهزمنا ويهزم عقيدتنا أحنا أقوى من كدة بكتير

دى دعوة لمقاطعة البضائع الهولندية مقاطعة دائمة غير محدودة حتى تتخذ السلطات هناك رد فعل مناسب بدل الأعتزار يافرحتى بيه

وهذة هى المنتجات الهولندية

أرجو منكم نشر هذة المنتجات وأن نستكمل مقاطعتنا لها حتى يحدث ما نتمناه ونريده نصرة لنبينا وديننا

أحسنتوا ياجنرز

2008-04-11T13:47:00.003+02:00

أحسنتوا ياجنرز

كانت من أسوأ اللحظات التى مرت عليا فى هذا العام خرج الأرسنال من دورى الأبطال الأوروبى بعد أداء أكثر من رائع من لا عبين شباب مازالوا فى بداية حياتهم الكروية فتحالفت كل الظروف ضد الأبطال القادمين من شمال لندن فلم يكتفى الحكم بالحظ العسير الذى كان يقف أمام اللعبين فى مباراتى الذهاب والأياب وعدم أحتساب الحكم لضربة جزاء فى مباراة الذهاب ممكن أن يحتسبها أى أنسان ليس له علاقة بالكرة

بل أن الحكم بيتر فرودفيلت أصر على أقصاء الأرسنال من البطولة بأحتسابه ضربة جزاء خيالية لليفربول
ولكن أحسنتوا ياأبطال لندن وستظلوا أبطال

وبالنظر الى الفرق المتأهلة لدور ال4 لدورى الأبطال الأوروبى ففرصة مانشستر يونايتد هذا العام كبيرة جدا فى الحصول على اللقب لأنى لم أرى منذما يقرب من 5 سنوات بعد فريق الأحلام الريال مدريدى فريق متكامل الى هذا الحد كما أرى الريد ديفلز حاليا

ياقدس

2008-04-01T13:10:00.001+02:00

ياقدس

ياثالث الحرمين..... ياثانى المسجدين..... ياأولى القبلتين..... يامهد المرسلين

رايحين كلنا رايحين
عالقدس يامسلمين
نحرر المظلومين
من أيد المعتدين

ياثالث الحرمين..... ياثانى المسجدين..... ياأولى القبلتين..... يامهد المرسلين

ماسكين فى أيدنا حجارة
وهما فى الطيارة
ضربونا يا ألف خسارة
زادت قلوبنا حرارة

ياثالث الحرمين..... ياثانى المسجدين..... ياأولى القبلتين..... يامهد المرسلين

يللا يا أم الشهيد
نروح نعمل عيد
على أبنك الشهيد
راح فدى المجيد

ياثالث الحرمين..... ياثانى المسجدين..... ياأولى القبلتين..... يامهد المرسلين

يللا شباب الموت
نقول بأعلى الصوت
القدس دى لينا
ولو بلعنا الحوت

ياثالث الحرمين..... ياثانى المسجدين..... ياأولى القبلتين..... يامهد المرسلين

فوق ياعربى فوق
خلى عندك ذوق
غزة بتتحرق وهى
مش ناقصة حروق

ياثالث الحرمين..... ياثانى المسجدين..... ياأولى القبلتين..... يامهد المرسلين

ياقدس ......... ياقدس ......... ياقدس

ياحلاوة

2008-03-26T16:54:00.007+02:00

يا نهار أبيض

النت دة أنا فعلا أكتشفت أهميتة بعد ما وصلته عندى من سنتين تقريبا ظروفى بتخلينى ساعات قاعد فى البيت اليوم كلة فطبعا ببقى قاعد معظم اليوم قدام الكمبيوتر وكل ما تتخيلة ممكن أعملة من خلال النت

لكن لية أحنا كشباب بيستهوينا أن أحنا نضيع وقتنا حتى وأحنا قاعدين قدام الكمبيوتر وفاتحين النت؟؟

المشكلة أن أحنا بنستخدمة فى حاجات لا تودى ولا تجيب زى الشات حد يقولى ياجماعة بجد أية أهميتة؟؟؟؟ أنا أعرف ناس أصحابى ليل نهار قدامة أنا مقولتش نبطلة علشان ساعات بتبقى طالبة نتعرف على ناس جديدة غير اللى بنشوفها كل يوم بس ميبقاش أدمان وحاجة يومية لازم تتعمل

لا والمشكلة الأكبر أن أحنا بنستخدمة كمان فى حاجات تغضب ربنا فقد كشفت الأحصائيات أن نسبة الدخول علي مواقع الجنس 80 % من مستخدمي النت في مصر ؟؟؟؟؟؟؟؟؟؟؟؟؟

مش بس كدة

من تقرير مؤشرات البحث عالنت

ثبت :

ان اكتر استخدام لكلمة جنس عالباحث كانت من نصيب مدينة القاهرة ..!!

اعلي نسبة بحث عن الكلمات دي كان في مصر ..: !!!!!!!!!

‏ Job

الجنس

‏الاغاني‏

, ‏الافلام‏ ‏الجنسية‏

, Haifa Wahby,

‏عمرو‏ ‏دياب‏

شفتوا الهيافة وأحنا بنستخدم النت فى أية ؟؟؟؟هيفاء وهبى وعمرو دياب وبعدين نرجع نقول لأ دة أحنا جامدين أوى وعندنا كمبيوتر لا مش بس كدة وكمان موصلين نت

عيب يا أبو تريكة

2008-03-19T16:54:00.004+02:00

عيب يا أبو تريكة

عنوان مقالة للكاتبة أقبال بركة فى جريدة الدستور تستنكر فيها اللى عملة أبو تريكة فى حفلتى دبى والقاهرة اللى أتعملوا لتكريم المنتخب الوطنى على فوزة بكأس الأمم

بدأت المقالة بأظهار أعجابها بأبو تريكة لما قام بة تعاطفا مع غزة وبعد كدة بدأت تخبط فقالت أية؟؟

لماذا انسحب أبو تريكة من الحفل ؟ هل لأنه لا يحب نانسي عجرم بالذات ؟ أم لأنه لا يحب الغناء بشكل عام ؟ و هل أبو تريكة لا يحب الغناء لأنه محروم من حاسة التذوق الفني ؟ أم لأن الغناء حرام و طبعا الموسيقى حرام و الفن كله ، بالمرة ، حرام ؟ "

أنا هنا هتقمص شخصية أبو تريكة وهرد أنتى أية اللى يهمك اذا كان أبو تريكة محروم ولا مش محروم من التذوق الفنى دى حرية شخصية زى ما أنتى طلعتى وقولتى أن الحجاب مش فريضة وكان دة تحت الشعار المستورد الحرية الشخصية اللى أحنا معندناش فكرة عنها بأمارة أن أحنا بنقول حاجة وبنكتب نقيضها وبعدين أنتى بتتسألى هل أن أبو تريكة لا يحب نانسى عجرم بالذات ؟؟؟؟
وأعتقد أنة باين لكل الناس أن أبو تريكة راجل متدين ملهوش فى الأغانى أصلا سواء لنانسى أو لسعد أو حتى لشعبان عبد الرحيم وخير دليل على ذلك تركه لحفل دبى أيضا وليس أنسحاب لأننا مش فى حرب فترك الحفلتين أول ما أبتدت الجماهير تنادى علية ذهب ليحيهم ثم ترك الملعب قمة الأحترام والأخلاق والأدب

وتضيف الكاتبة ردا على مقال قرأته يشيد بما فعل ابو تريكة وتقول : "هل وصلنا الى هذا الحد من الجليطة و قلة الذوق لدرجة ان ننسحب من حفل تكريمنا لأن فنانة محبوبة و لها شعبية كبيرة جاءت من بلدها خصيصا لتجاملنا وتغني ابتهاجا بفوزنا

الجليطة وقلة الذوق أن أستغل قلمى فى سب الناس المحترمة بدواعى وهمية وبعدين هى جاية مخصوص لأبو تريكة لو كدة يبقى معاكى حق فى اللى أنتى قولتيه

وتؤكد على ان ما فعله ابو تريكة لا يضيف الى رصيده عند الناس مستشهدة بأن ملايين العرب يدفعون أموالا ضخمة في الفيديو كليبات و تذاكر حفلات المطربين !!ا

فعلا هو مش هينقص ولا يضيف لأنها حرية شخصية كما تدعى وأنتى بتسواى أبو تريكة بالناس الهلس دول ( أيش جاب لجاب)!! !! !!ا

وتقول ايضا ان مثل هذه الأفعال تدخل في إطار ما اسمته بالدروشة التي لا محل لها في ديننا الحنيف و تكاد تتهمه بأنه يفتعل تلك المواقف ليلفت اليه الانظار ويحفز البعض للكتابة عنه بلا انقطاع !!

دروشة أية ياست؟؟؟ أنتى شيفاة بينزل الملعب وبيقول مع اللعيبة (اللة حى اللة حى) وبعدين أنتى بتتكلمى عالدين لية أصلا ومين قال أن الدروشة ملهاش محل فى ديننا النحيف وأبو تريكة أكبر وأسمى من أنه يخلى الناس تكتب عنة لأنها كدة كدة بتكتب عنه من غير حاجة

وتختتم مقالتها مؤكدة على ان حصار الفن الجيد و خنقه والتحريض على نبذه هو الذي افسح المجال للفن الردئ وليس الحل في الانسحاب علنا وبشكل استعراضي عندما يهل علينا اي مطرب وانما في تشجيع الفن الراقي والاقبال على كل ما هو جميل وممتع وراق واعطاء المثل لمحبينا في الذوق والكياسة المعروفة عن المصريين !!ا

أنا تهت المقال دة عن أية بالضبط عن الفن الردئ ولا أبو تريكة ولا أية بالضبط

قمة التناقضات من أنسانة حاقدة على حب الناس لأبو تريكة وشعبيتة الجارفة

الجامعة العربية

2008-03-16T00:13:00.005+02:00

الجامعة العربية

.................................بيقولوا الجامعة العربية
هدفها الوحدة العرقية...............................
....................................ولكن الدول العربية
هممها المؤن الغربية...............................
.........................وكسب المصلحة الشخصية
ياشماتت الدول الغربية...................................
............................ياسلام عالدول العربية
لو تنمى معنى الوطنية...................................
................................وتعلى الراية القومية
شعارها دولة اتحادية..................................
..........................لا نخاف من أسلحة نووية
ولا حتى قنبلة ذرية.................................
.............................عايزين مبادرة مصرية
او حتى تكون قطرية..................................
...............................المهم جامعتنا العربية
تمشى بالمبادئ الأسلامية........................................
............................علشان الدول الأوروبية
ما تجيبش سيرة السامية.......................................
.......................ولا تقول حاجة عن الحرية
ونتعرض لعقوبة دولية......................................
...........................بيقولوا الجامعة العربية
هدفها الوحدة العرقية.....................................

سلام كبير أوى لجامعتنا العربية

تاتارارارا .......................تت تت

الضمير العربى

2008-03-08T23:06:00.001+02:00

صحوا قلوب الناس .....صحوا بنا النخوة

بكيت حين سمعتة...تقطعت حين فهمتة...تألمت حين فكرت فى الحل

فيالة من موقف صعب أن تصحى قلوبنا أولا وحين تستيقظ قلوبنا من نومها فسيستيقظ ضميرنا وسنحكم عقلنا فى كل ما حولنا لأن القلب هو أساس الحياة

أزاى نصحى قلوبنا وأحنا مشتتين ومش مستحملين بعض فزمان أيام ما كنت بدخل على غرف الشات كنت بشوف كلام وجمل ماقدرش أتخيل أن هى تتقال بينا وبين بعض بس كذب تخيلى فوجدت كلام لا يمكن أن أوصفة الا بالقبيح بين الخليجين والمصريين كلام لا يمكن أن يتخيلة شخص عاقل أنة يقال بينا وبين بعض

أزاى نصحى قلوبنا وأحنا مثلا فى الكورة لم نجد الا غيرها سبيلا لننتمى الى شئ ما حتى لو كان هذا الشئ تافها ولو شوية أهلاوية شافوا زملكاوى بالشارع هيستفردوا بية وأحتمال يصل الأمر الى القتل فى بعض الأحيان وطبعا العكس هل ياجماعة لوشوفنا أسرائيلى ماشى فى الشارع هنعمل معاة كدة؟؟؟؟؟ أنا شخصيا بالفعل لم أجد ما أنتمى الية الا فى كرة القدم لأنى مقصر ولم أبحث عن غيرها سبيلا للأنتماء فلن بستطيع الأنسان أن يعيش دون الأنتماء لشئ ما

أزاى نصحى قلوبنا ونحكم عقلنا فى النزاعات الطائفية اللى بتحصل فى البلد الواحدة مسلمين مع مسيحين وشيعة مع سنة وللاسف مسلمين مع بعضهم

ياجماعة دى المشكلة أكبر من كدة مشكلة أن أحنا حتى فى بيوتنا مش مستحملين بعض فالأب مش مستحمل أولادة والعكس

أين النخوة؟؟؟؟
أنا أتكسفت من نفسى أوى لما شفت كليب الضمير العربى وشفت المظاهرات اللى حصلت من المسلمين فى الدول الأوروبية وأنا مفكرتش أشوف حتى أية اللى حصل فسمعت الخبر ومر عليا كأنة خبر عن ممثل أو ممثلة أو لاعب كرة
معقول أحنا وصلنا لكدة القلة المسلمة اللى فى البلاد الأوروبية حاسة بمشاكلنا وأحنا مش حاسين

هيا بنا كعرب نبدأ بأنفسنا أولا فمن يختلف مع الأخر فى الرأى فليحاورة لا يهاجمة فالحوار الطريقة المثلى لأيصال

الفكرة حقا عن تجارب عديدة لكن اذا لم نلجأ سوى للهجوم والتجريح فلن نصل لأى شئ

فهذة دعوة لينا كعرب شباب وبنات أن نتحاور فالحوار هو طريقنا للأتحاد

مصر فوق الجميع

2008-03-03T11:47:00.000+02:00

أهلا بيك على (الدكة) بعد أن وضح كل شئ

يخطأ الأنسان منا العديد من الأخطاء ولكن الخطأ لة حدود والا فسيفعل كل منا ما يتمناة ويشتهية بدون تفكير فى مصلحة الاخرين واذا فشل فيقول (أنا غلط ) للخطأ حدود والأنسان السوى التى تكون أخطاءة لا تمس أحد غيرة وليس الذى يخطأ ويعتذر فنصورة نحن ويصورة الأعلام قبلنا بأنة بطل قومى

تربينا على مبادئ معينة فمن المستحيل أن ترى لاعب يلعب فى نادى أوروبى يترك ناديى ويرحل (بمزاجة) ولعل اللاعب المصرى (حسام غالى ) خير دليل على ذلك فبالرغم أنة كان خارج حسابات المدير الفنى لفريقة (توتنهام ) أنتظر حتى يأتى لة عرض مناسب عن طريق نادية

عفوا أيها الحضرى سيبقى النادى الأهلى كبير بك أو بدونك وستبقى مصر وأسمها أكبر من أى شئ

ومرحبا بيك على ( دكة البدلاء) ياحضرى

وسأختم بالشعر و أسترجاعا للحظات التاريخية التى عشتها فى نهائى بطولة افريقيا للأندية بين النادى الأهلى والنجم الساحلى التونسى

ساعة تحديد المصير

كنا فى مكان واحد
قلوبنا كانت بتطير
كنا شباب كتير
وكمان كان فية قمامير
ساعة الصفر أقتربت
ساعة تحديد المصير
مين هيروح اليابان؟
ومين هيتغطى فى السرير؟
أملنا كان كبير
أكبر من أمل العصافير
لما تروح تدور عالأكل
وأملها فى ربنا كبير
خوفنا كان من الشباب
أو الحظ العسير
فريقهم ماشى مش بطال
لكن ذكرياتهم معانا طعمها مرير
أوعوا تنسوا التلاتة
اللى على ملعب المشير
ولا سوبر أديس بابا
بقرار من حياتو الشرير
أنا بس حبيت أفكركوا
أن الطريق مش سهل ومنير
أبتدت مباراة الحسم
وعليت صوت الصفافير
شكلهم فى الملعب حلو
مش زى ما أتخيلتهم فرافير
خلص الشوط الأول
وأخدنا القلم الكبير
غلطة منك ياشادى
هزت شباك الوزير
ما طحط رجلك صح
خليك أسد وليك زئير
وفى الأستراحة فكرت
ياترى مين هيدفع الفواتير؟
هيطلعوا العيب فى لاعب
ولا العيب فى الجماهير
أبتدت المعركة فى الشوط التانى
والأهلى كان المغير
يامغيث ألحقنا بسرعة
وأقنع البرتغالى بالتغيير
حاكم هو دماغة ناشفة
وهيلبسنا كلنا طراطير
أنتشارنا فى الملعب كويس
خلناهم زى الصراصير

مستنيين الجول دلوقتى
والا هنروح نعمل عصير
وهنوزعة على التوانسة
مش عالراجل المصرى الفقير
اللة أكبر وللة الحمد
هدف للمرعب الخطير
ماتحركتش من الكرسى
أتثبت زى المسامير
هيعملوها الرجالة ولا أية؟
ويقلبوا كل المواسير
معلش قصدى الموازين
الفرحة نستنى حتى التفكير
الماتش كان عايز بركات
كان هيبقى لية تأثير
مشيت دقيقة ورا التانية
والوقت بيعدى وبيطير
وكانت صدمة ليا
ولكل الحضور الغفير
التانى جة وراة التالت
خلاص ضاع الأمل الأخير
لعيبة النجم أحتفلوا
وهياخدوا من الذهب قناطير
ضاع حلم اليابان
وأخرنا نروح كشمير

لكل بداية نهاية
قالها اللى عندة ضمير
بس أحنا نعد العدة
والسنة الجاية هنكون غير
وكانت دى نهاية الساعة
ساعة تحديد المصير

من انا؟

2008-02-17T15:12:00.000+02:00

من انا؟

كانت هى من دلت قلبى الى طريق الحب بعد أن كان تائة لسنوات عديدة لا يعرف كيف يصل الية؟ كانت هى الأولى التى عندما أراها أنسى كل ما فى عقلى من كلمات وحينما أراها أتمنى أن أذهب وأعانقها وأقول لها عما يدور فى خاطرى لكن كرامتى كانت تتحكم فى تحكم السيد لعبدة فكلما أراها اذهب لأصافحها وأتحدث معها عن أى شئ الا عما يدورفى خاطرى لأنى وبصراحة كنت أشبع رغبتى بمجرد أن أتحدث معها وبمجرد أن تضحك بوجهى أرى ذلك كافيا لى

أردت ان أضع نهاية لهذة القصة التى لا أتمنى أن تكون نهاية لها ولكن لكل بداية نهاية فأزلت من قلبى كبريائة وعزتة ولو لدقائق لأنى لم أكن أعرف كيف يمكنها أن تقبل ما سوف أقولة لها؟ فقررت أن أذهب اليها لكى أعترف لها بحبى ولكنى تراجعت عندما وقعت عيناى عليها من بعيد وحدثتنى نفسى ماذا أذا أحرجتنى ولم تستمع لى من الأصل؟وماذاوماذا..................؟ لكن كان يقف فى هذة اللحظة معى صديق لى أخذ يحمس فى بكل الطرق الممكنة والغير ممكنة حتى استنفرت وتركتة متجها أليها مباشرة وطلبت منها أن أحدثها فى موضوع بمفردها فوافقت فشعرت بشئ غريب يدور بداخلى رائع ومرعب فى الوقت نفسة فمضيت ما يقرب من النصف ساعة أحدثها بمواضيع فرعية محاولا ترتيب أفكار الموضوع الرئيسى فى عقلى

حدثتها عما يدور فى خاطرى فطلبت منى الأنتظار قليلا فعلمت أنها تحتاج الى وقت حتى تفكر جيدا فى هذا الأرتباط فتركتها وعدت عودة الفاتحين الذين فتحوا ما يستطيعوا أن يفتحوا من أجزاء العالم وكان معى حق فبالنسبة لأنسان لأول مرة يجرئ على أن يصارح من يحب بحبة مقبول هذا الفعل ومرت الأيام وقد امهلتها للكثير من الوقت وأردت أن أعرف موقفى فكانت صدمتى انها أرادت أن نظل أصدقاء فقط حتى لا أسبب لها الحرج أمام صديقاتها وزملائها

صدمت من قولها هذا وحاولت أخفائة بداخلى لكنى لم استطع فسألتنى ما أذا كنت تضايقت؟ فتماسكت وعادت لى عزتى فكان ردى (انا مش عايز أضغط عليكى بس أنا مستغرب من ردك) وكان هذا أخر شئ أتذكرة من هذة المقابلة لأنى بعد ذلك أصبت بعمى وصمم فلم أستطع أن أرى أو أسمع أى شئ بعد ذلك الا جملة واحدة منها قبل مغادرتى مباشرة وهى (على رنات بقى) لم أفهم وأستوعب هذة الجملة الا بعدها بفترة بعدما أخذت أتذكر مجريات الحديث

فتذكرت فى هذة الليلة الطويلة التى مرت على ما فعلتة او بالأحرى ما لم افعلة مع هذة الفتاة التى كانت تريد ان تصل الى فى اى مكان واى زمان وكانت لها محاولات كثيرة فى ذلك لا مجال للتطرق اليها حاليا فهل من قال ( كما تدين تدان) كان يقصدنى أنا بهذة المقولة أم أنة لا شئ وانا من ضحكت على نفسى بحب واهى وقصة من نسج خيالى فمن أنا ؟

هل أنا العاشق الولهان الذى لا يستطيع أن ينسى حبة الاول؟

أم أنا الشخص الذى لن يفرق معة أى شئ أو عثرة ممكن أن يواجهها فى حياتة؟

حقا أنا لا أعرف من أنا وأن الأيام كفيلة بأن ترد على هذا التسائل

صور

2008-02-05T02:21:00.000+02:00

الحب لا هو بلطجة ولا بالعافية؟

دلوقتى بقى فى موضة أن كل واحد لازم يكون مصاحب واللى مش مصاحب دة يبقى بنى أدم مش طبيعى . القصة مش تحدى ولا واجب وطنى لازم على كل مواطن تأديتة

الموضوع أنك تلاقى حد تحس أنة قريب منك او فية الحاجات اللى أنت عايزها اكيد مش شبهك أحسا هتكون الحياة مملة أوى

وكمان الموضة اليومين دول أن البنت لم تتكلم فى أى برنامج أو حوار صحفى تقولك أنا أحب اللى هرتبط بية يكون عندة علاقات وخبرة

حاجة غريبة واللة

دلوقتى الموضة أن الواحد يطلع من علاقة يخش فى علاقة وكمان واللة ممكن الكلام دة يكون فى نفس اليوم المشكلة أن صاحبنا دة مش عارف أن العلاقة الاولى أصلا كانت وهمية فى الأصل وأن صاحبتنا كانت بتتسلى بية او (واخداة أستبن) لو الكاوتش الأساسى فرقع تركب الأستبن شوية لحد ماتصلح الأساسى أو تشترى واحد جديد ودى الصورة الأولى اللى بقت منتشرة أوى عندنا دلوقتى وطبعا العكس صحيح يعنى ممكن (الأستبن) يبقى صاحبتنا

أما الصورة التانية ان صاحبنا عايز يخش فى علاقة مع واحدة حلوة وجامدة مش علشان حاجة هو أصلا ولا لية فى الحب ولا البطيخ بس علشان الناس تقول وااااااااو........................ اول ما تشوفة مع الحتة الجامدة وعلشان يتنطط قدام أصحابة ويبان انة (دنجوان) عصرة وزمانة اللى مجاش ولا هييجى زية

الصورة التالتة اللى برضة منتشرة اليومين دول أن صاحبنا زهق من الاشكال اللى بيشوفها كل يوم وعايز يغير شوية يتكلم فى التليفون يرد علية صوت ناعم شوية مش الأصوات اللى متعود يسمعها وحد يبقى خايف علية وبيسأل علية مش يقولة فى التليفون(هتنزل ولاهتترزع فى البيت؟) وكمان صاحبتنا زهقت من الكلام العادى الممل فى التليفونات وعايزة تغير شوية تسمع صوت جديد تشوف أشكال جديدة والميزة فى الصورة دى ان صاحبنا وصاحبتنا بيبقوا عارفين ان الموضوع وقتى وهيروح لحالة ودى مبلوعة شوية

دى الصور اللى موجودة كتير فى مجتمعنا دلوقتى

ياترى أنت/أنتى مين فى دول او غير دول ؟

الحب الصادق مش مرتبط ولا بمكان ولا بزمان هو بييجى فى وقتها وبظروفها فلو هتخشى فى علاقة لازم تحددى هدفك من العلاقة دى قبل ماتبتدى فيها هتريحى نفسك وهتريحى اللى معاكى ومتسعجلوش عالحب جاى جاى هيروح فين ؟
الصور اللى أستعرضتها دى اللى جت على دماغى اللى يشوف صورة تانية يقولى عليها ويقولى أية رأية فى الكلام اللى زى الفل اللى أنا قولتة فى موضوعنا الأفتتاحى قولولى رأيكوا علشان محضر ليكو مفاجأة الموضوع الجاى

ولسة هنتكلم و على راحتى

2008-02-05T01:47:00.001+02:00

فى البداية احب اقول لقراء هذة المدونة الاعزاء ان انا مش هتكلم بالعربية الفصحى واصعب الحياة اكتر ماهى صعبة لا انا هتكلم باللغة بتاعتنا.وكمان انا ماليش فى السياسة ولا احب يبقى ليا فيها كدة اريح مش كدة؟ احنا هنتكلم مع بعض فى كل حاجة الا................................... ايوة كدة اديكوا عرفتوا. وعايز ردودكوا فى اى موضوع او قصيدة هكتبها. واتمنى ان احنا نقضى وقت حلو مع بعض نفيد ونستفيد ونعرف رأى بعض.وشكرا